Minister di Enseñansa, Siensia, Kultura i Deporte (ESKD) sr. Sithree van Heydoorn huntu ku representantenan di Fundashon Tur Ta Konta a hasi bishita na dos skol di fundeshi riba dia internashonal di matemátika: 14 mart 2025.
Na e promé skol Kolegio San Domíniko na Montaña Rei a tuma nota di vários aktividat ku e skol ta organisá spesialmente riba e dia kaminda por a mira kombinashon di e materia matemátika ku moveshon, idioma, digitalisashon i hopi mas. Kabes di skol huntu ku dosentenan a prepará e aktividatnan kaminda ta laga e alumno sera konosí ku e materia den kosnan di bida kontidiano. A hunga un bingo kaminda mester move di forma físiko pa por nota e number. A laga alumnonan sinta bou di palu den fresku i traha sòm riba ‘tablet’. A laga e hóbennan bula kabuya i konta e kantidat ku a bai bon.
Na e di dos skol di Fundeshi Atventista na bario di Koraalspecht a tuma nota di aktividat kaminda e muchanan a eksplorá trahamentu di pizza ku matemátika. E alumno nan por a traha nan pizza i parti esaki den 2, 3, i 4 pida i asina siña frakshon manera ½ i ¼. Tambe a wak alumnonan ku ta hasi uzo di e aplikashon di Magrid kaminda e alumno ta praktiká ku e materia di matemátika di un forma digital. Esaki ta un aplikashon ku a sali for di e akuerdo ku a firma ku e Magrid Education di Luxembourg. Ta importante pa indiká ku e aplikashon digital aki ta keda usá na mas skol i ta bai keda introdusí na mas skol di fundeshi. E aplikashon ta mehorá e abilidat matemátika i kognitivo for di edatnan di 3 pa 9 aña.
Durante di henter e luna ku a keda dekretá komo luna di matemátika ta bai hasi mas bishita na skolnan. Tambe ta bai tin mas aktividat pa nos hóbennan di skolnan sekundario kaminda nan tambe ta bai eksplorá mas ku e materia di matemátika ku ta sumamente importante den e mundu moderno ku ta sigui desaroyá den e era di digitalisashon.
Minister di ESKD sr. Sithree van Heydoorn a keda sumamente kontentu ku e bishita i na mes momentu e la yama maestronan danki pa nan dedikashon i aporte na nos enseñansa riba e dia internashonal di matemátika 14 mart 2025.
