Den kuadro di digitalisashon di Enseñansa a hasi entrega di ‘device’ na e dos promé skolnan di fundeshi. Minister di Enseñansa, Siensia, Kultura i Deporte sr. Sithree van Heydoorn a hasi entrega di 50 laptop na maestronan di e skolnan di Fundeshi Emmy Berthold i Prins Bernhard. Durante di e periodo ku ta sigui ta bai hasi entrega di e ‘device’nan na tur skol pa asina nos sigui kana ku e trayekto di digitalisashon di enseñansa.
E ‘device’nan ta un instrumento sumamente nesesario pa nos sigui duna enseñansa den e era moderno di siglo 21. Esaki ta forma parti tambe di e maneho di digitalisashon ku tin su base den e maneho na distansia (Afstand-Onderwijs-Blended Learning) ku a keda aprobá. tambe miisyer a hasi entrega di tablet na alumnonan di Emmy Berthold ku próksimamente ta bai kuminsá ku e aplikashon di Magrid Education Learning ku ta speshalmente pa mucha desroyá nan abilidat di matemátika i kognitivo for di edatnan di 3 pa 9 aña.
Na skol di fundeshi Prins Bernhard e Direktor di skol sekundario AGO G.E.E. Kroon sr. A. van Putten tambe a informá ku e skol su alumnonan ta bai traha un kashi speshal pa warda e ‘device’ nan di e alumnonan ku pronto ta keda entregá. Esaki ta bira un proyekto meskos ku esun anterior kaminda e alumnonan bou di guia a traha e kashinan di biblioteka mobil ku tin den kada grupo.
Ministerio den su totalidat tin un tim ku ta traha pa karga e trayekto aki. Ta un tim di eksperto- i kolaboradornan huntu bou di guia di e tim di maneho i minister huntu a traha pa yega na e momentu históriko aki. Tur e esfuersonan aki huntu ta hiba na mehorashon di enseñansa ku ta e logro pa un mihó formashon di nos futuro generashonnan.
Minister di ESKD sr. Sithree van Heydoorn ta sigui traha na bienestar di enseñansa kaminda e maestro, dosente i e mucha ta pará sentral den e maneho di mehorashon di enseñansa. Ku entrega di e promé ‘device’nan ta sigui traha konforme e ‘roadmap’ di e proyekto di Digitalisashon: TOPA MI RIBA E RUTA DIGITAL, DEN E PLAN PA MEHORASHON DI ENSEÑANSA.
