Despues di tin hopi tempu será, Ministerio SOAW a opta pa bolbe habri Kas di Bario Dokterstuin spesífiko pa área di Bándabou. Esaki ta debí na e difikultat pa kliente sali di Bándabou i yega un otro Kas di Bario mas pariba. Na momentu ku Minister di Desaroyo Sosial, Labor i Bienestar, sra. Mr. Dayanara Chin-A-Lien-Roozendal, a asumí enkargo di e Ministerio, el a risibí bastante petishon di habitantenan pa habri e Kas di Bario Dokterstuin. Minister a tuma e petishonnan aki hopi na serio i a buta prioridat na re-apertura di e Kas di Bario. Tambe minister a opta pa hasi sierto kambionan na e edifisio di Kas di Bario Dokterstuin pa hasi esaki mas agradabel.
Entrante 8 di April 2025, kaminda antes tabata ofisina di Giro Bank na Dokterstuin, tur habitante di Bándabu ku tin un petishon, pregunta òf mester di un yudansa, por pasa hasi nan petishon na loke a bira Kas di Bario Dokterstuin. Pronto lo anunsiá e fecha riba kua Domeinbeheer tambe lo kuminsá duna su servisionan na e Kas di Bario.
Loke ta distinguí e kas di Bario for di esun anterior ta ku e ministerio ta bai enfoká mas riba situashonnan di atenshon den bario i e Kas di Bario Dokterstuin ta bira e kas di formashon, konsientisashon, informashon i transformashon pa habitantenan di e bario.
Durante e promé lunanan e ofisina lo ta habrí 3 biaha pa siman riba djaluna, djárason i djaweps. E orarionan pa risibí kliente lo ta for di 8’or te ku 11’or di mainta. Parti mèrdia e trahadónan lo risibí kliente ku sita i lo konsentrá riba bishitantenan den bario i seshonnan di formashon.
Kas di Bario Dokterstuin ta warda tur habitante di área di Bándabou ku tin mester di un òf mas produkto òf servisio di ministerio SOAW.
Banda di esaki e personal di e Kas di Bario ta invitá organisashonnan di bario ku ke traha huntu ku SOAW i hasi uso di e Kas di Bario pa trayekto i proyektonan sosial, kultural i edukativo. Organisashonnan di bario por yama 724-5253 pa un sita.
