Durante e periodo di 2018 pa 2024Kaya Kaya a krese bira un evento grandi i popular spesialmente pa su Festival. Kaya Kaya ta konosí tambe pa e muralnan kolorido i otro piesanan di arte den Ser’i Otrobanda i besindario. Mirando e embergadura di e programa despues di 7 aña, e kantidat di mural i piesanan di arte, e kresementu den akomodashon, partisipashon di Horeca i e imágen di Otrobanda ku a konosé rekonosementu lokal i internashonal último añanan ta e momentu pa un otro aserkamentu. Despues di evaluashon interno i input di habitante i partnernan, Kaya Kaya a skohe pa un transformashon di festival pa un movementu ku diferente evento, aktividat i proyekto henter aña.
Kaya Kaya Festival vs Kaya Kaya Street Party
Kaya Kaya ta evolushoná! Kaya Kaya Festival lo tuma lugá kada dos aña, ku e siguiente edishon planiá pa 2026. Entretantu, riba djasabra 23 di ougùstùs 2025, lo reintrodusí Kaya Kaya Street Party—un ‘Destination Event’ kultural ku énfasis riba músika, baile, arte, gastronomia lokal i mas.
E Street Party ta keda un eksperensia multi-stage i vibrante ku un kapasidat di 10.000 bishitante kompará ku 20.000 durante Festival i ta sigui duna plataforma na talento lokal i empresarionan. Ademas, e evento den ougùstùs awor ta sirbi komo selebrashon di e esfuersonan di henter aña, inkluyendo presentashon di e diferente proyektonan ku Kaya Kaya ta trahando riba.
Ku e adaptashon aki, Kaya Kaya ta repartí su rekursonan mihó, ta fortalesé su impakto riba Otrobanda i ta prepará tereno pa un manifestashon kultural grandioso den 2026.
2025 – 2028: Kaya Kaya Movement
Otrobanda ta un distrito riba su mes ku meresé mas atenshon. E intenshon ta pa sigui desaroyá e bario i ‘Brand’ esaki na un manera struktural. Pa realisá e vishon aki Kaya Kaya a instruí un profeshonal pa traha un Masterplan. E pregunta ta unda Otrobanda lo ta aki 3, 5 i 10 aña?
Pa e plan di mas aña lo organisá diferente enkuentro, presentashon, tayer, training i coaching pa e.o. inventarisá tur idea i proposishon ku bini dilanti i huntu ku diferente partner traha un plan di akshon di loke tin prioridat, ta posibel i na alkanse di tur partner embolbí. Durante e proseso ta embolbí habitante, komersio i organisashonnan den bario i tur otro partner ku ta kontribuí na e komunidat di Otrobanda. Un movementu efektivo i kreativo ku impakto duradero riba 4 área: Sosial, Medio Ambiente, Ekonómiko i Kultural den kua ta tene kuenta tambe ku desaroyo urbano i atenshon pa e nesesidatnan di e bario. Di e forma aki e plan lo ta unu kargá pa habitante, empresario i organisashonnan di Otrobanda.
Kaya Kaya 2025
Entrante 2025 a skohe pa un seri di evento i aktividat repartí henter aña manera Merkado Amor pa Otrobanda, Siman di Arte (Art Week), kompetensia di futbòl, Kriativiti Fest, un festival den kua ta presentá i reforsá e industria kreativo lokal, Skol Urbano i Artwalkstry ku tambe lo tei e aña aki i Kaya Kaya Street Party. Ta sigui traha tambe riba proyektonan sosial edukativo pa yuda halsa nivel di kalidat di bida di habitantenan i empoderá empresarionan. E meta ta tambe pa tur habitante, bishitante i turistanan sinti nan mes bon biní i seif pa kana den kayanan di Otrobanda.
AMOR PA OTROBANDA
Otrobanda ta un bario riku na historia i kultura. Pa e motibu aki tambe a inisiá e konsepto Amor pa Otrobanda, un inisiativa den kua ta enfoká riba pasado, ta empoderá nos hendenan di bario pa konstruí un futuro Otrobanda ku su propio identidat. Ta e intenshon pa posishoná Otrobanda komo e kurason vibrante di Kòrsou, ku alabes ta kontribuí na e aspekto kultural, sosial i ekonómiko di e bario. Durante aña lo organisá diferente Merkado Amor pa Otrobanda. Ademas di esaki ta bai kompartí historia, aktividat, evento i inisiativanan di empresarionan den Otrobanda. Di e forma aki ta kontribuí tambe na revitalisashon di Otrobanda pa un i tur (re)deskubrí Otrobanda su arte, kultura i historia.
Merkado Amor pa Otrobanda
Merkado Amor pa Otrobanda ta un evento kultural ku ta konsentrá e.o. den Breedestraat, e área i kayanan rondó di viadukto bai direkshon di e plenchi patras di parada di bus. Meta di e merkado ta pa trese habitante, bishitante, organisashon i empresarionan huntu pa demostrá nan kompromiso ku Otrobanda. Huntu ta selebrá nos kultura di forma kreativo pero tambe ta kontribuí na desaroyo di e bario. E promé Merkado Amor pa Otrobanda tabata un éksito rotundo. E próksimo 2 Merkado Amor pa Otrobanda ta tuma lugá riba djasabra 29 di mart den ambiente di Seú i djasabra 27 di aprel ku tema Dia di Rei.
Por sigui tur desaroyo di e movementu i fecha di e diferente evento, aktividat i proyektonan tambe via e plataformanan sosial di Kaya Kaya, website: wwwkayakaya.org i via Instragram i Facebook: @kayakayafestival, @amorpaotrobanda, @artkayakaya, @skolurbano.
