Ministerio di Salubridat, Medio Ambiente i Naturalesa (GMN) a tuma nota di un item ku a ser transmití resientemente na un televishon ku a partisipá ku bishitantenan di playa Sta. Cruz a ekspresá nan preokupashon tokante e falta di fasilidat na e playa, spesífikamente pa preparashon pa e periodo di siman santu ku ta aserkando. Ministerio di GMN ta enfatisá ku atrabes di hopi aña e asina yamá “Operashon Siman Santu” a demonstrá ku e kolaborashon di tur stakeholder ta sumamente importante pa garantisá seguridat, limpiesa i órden públiko durante e temporada aki. Esaki ta konta no solamente pa nos playanan na Banda Bou, sino tambe pa otro áreanan na parti súit di nos isla.
Durante hopi aña kaba Ministerio di GMN ta sòru pa garantisá ku e playanan ku ta risibí mas bishitante durante Siman Santu ta wòrdu limpia i ku e públiko ta disponé di e fasilidatnan nesesario. Playa di Sta. Cruz semper ta haña èxtra atenshon komo tin un grupo basta grandi di persona ta kamper na e playa. Pa duna e bishitantenan un eksperensia komfortabel i higiéniko, semper sa instalá vários ducha, pone baki grandi di shushi i pòrta pòti ku ta keda limpiá 2 bes pa dia pa garantisá un ambiente limpi i sigur pa tur hende. Pa loke ta trata playa di Sta. Cruz, esnan ku tur aña ta kamper na e playa ta na altura ku nan por konta ku un playa limpi ku tur fasilidat básiko. Riba potrètnan di nos archivo por mira e fasilidatnan ku públiko semper por a disponé di dje na e playa durante Siman Santu.
Ministerio di GMN ta sigui dediká su esfuerso pa garantisá un eksperensia organisá i agrabel pa tur bishitante di nos playanan i ta keda subrayá ku e responsabilidad ta di nos tur huntu pa logra e meta aki.
