Departamento di Reibeweis ta informá ku entrante djaluna, 7 di aprel 2025, registrashon ta habri pa tur studiante ku ta bai studia den eksterior por saka nan reibeweis. Registrá pa bo pasa èksamen pa reibeweis promé ku bo biaha pa estudio.
Tur studiante ku ta bai studia pafó di Kòrsou den e aña eskolar benidero i ku ke pasa nan èksamen di reibeweis, mester manda nan registrashon via e-mail pa e Departamento di Reibeweis. Di e forma akí, e departamento di Reibeweis por plania mihó i garantisá un bon servisio.
Último dia pa registrá na Departamento di Reibeweis, ta djabièrnè 13 di yüni 2025. Na momento di registrashon, tur studiante interesá mester a kumpli 18 aña kaba.
- E e-mail ku studiantenan por usa pa manda nan registrashon ta [email protected].
- Huntu ku e registrashon mester manda un kopia di identifikashon di e studiante i tambe prueba di su petishon na Stichting Studiefinanciering Curaçao (SSC) òf otro instansha ku ta enkargá ku studiantenan ku ta bai studia den eksterior. Esaki mester indiká ku e ta studiante ku ta bai studia den eksterior e aña di eskolar 2025/2026.
- Studiantenan ku ta bai studia den eksterior, sin aporte di SSC, mester tin un deklarashon di skol aktual.
Pa mas informashon por tuma kontakto via number di telefòn 736-2929 òf manda un mail na [email protected].
