Vários organisashon afiliá na Actiecentrum Ondermijning Curaçao (ACOC) ku tin di haber ku e riesgonan di labamentu di plaka komo resultado di e introdukshon di e florin Karibense, a inisiá un kampaña konhunto. E kampaña aki ta dirigí na institushonnan i sektornan ku ta obligá pa informá transakshonnan inusual na e Unidat di Inteligensha Finansiero (FIU), pa nan bira mas konsiente di e riesgonan spesífiko asosiá ku e transishon pa e florin Karibense nobo. Tambe e kampaña ta enfoká riba komunidat den su totalidad, pa inform’é riba e ròl ku e tin pa prevení labamentu di plaka i otro tipo di krímen finansiero.
Kombatimentu di labamentu di plaka ta rekerí un aserkamentu multidisiplinario. P’esei e kampaña aki ta wòrdu sostené dor di Banko Sentral di Kòrsou i Sint Maarten (CBCS), Financial Intelligence Units (FIU) di Kòrsou i Sint Maarten, Curaçao Gaming Authority (GCA) pero tambe dor di e kadena hustisial; Ministerio Públiko (OM), Kuerpo Polisial di Kòrsou i Sint Maarten, Recherche Samenwerkingsteam (RST).
E introdukshon di e florin Karibense ta trese kambionan importante. Introdusí un moneda nobo tambe ta oumentá e riesgo di labamentu di plaka. Huntu, a kuminsa identifiká e diferente riesgonan di labamentu di plaka asosiá ku e introdukshon di e moneda nobo. Ta importante pa e grupo empresarial i demás organisashonnan relevante ta bon informá riba e riesgonan di labamento di plaka ku e transishon pa e moneda nobo ta trese kun’é. Ademas, ta importante tambe pa sosiedat den su totalidat ta konsiente di e riesgonan potenshal di labamentu di plaka. Sosiedat ta hunga un ròl importante den rekonosé aktividatnan sospechoso. Por ehèmpel, ta importante pa sa e orígen di plaka ora bo wòrdu pidí pa kambia plaka pa un otro hende pa bo no kontribuí na labamentu di plaka.
Mensahe
E mensahe di kampaña lo wòrdu distribuí atraves di vários kanal di medionan sosial na Kòrsou i Sint Maarten pa informá públiko en general tokante e vários riesgonan di labamentu di plaka ku tin i unda por mèldu aktividatnan sospechoso. E diferente partnernan ta enfatisá ku e esfuerso konhunto di tur sektor ta nesesario pa garantisá e integridat finansiero di nos sistema monetario. Solamente dor di ta konhuntamente alerta pa e riesgonan nos por kombatí labamentu di plaka i otro kriminalidat finansiero di forma efektivo.
ACOC
E ACOC ta un plataforma ku ta kai bou di Ministerio di Hustisia i ta komprometé na un aserkamentu integral i atministrativo pa kombatí kriminalidat ku ta debilitá nos komunidat, den kual koperashon entre partnernan paden i pafó di kadena hustisial ta sentral.
Pa mas informashon tokante e kampaña di konsientisashon i e ròl ku por hunga pa prevení riesgonan di labamentu di plaka, por tuma kontakto ku ACOC na [email protected].
