E di 72 edishon di e Festival di Beyesa di mas prestigioso na mundu “Miss World” ta tuma lugá na Telangana, India.
120 beyesa representando mundu henter di diferente kontinente manera Afrika, Europa, Amerika, Caribe, Asia i Oceana lo tuma parti na e di 72 sertáman di “Miss World”. Miss World Curaçao “Shubrainy Dams” ta forma parti di e 120 beyesanan aki i tin e gran honor di representá nos dushi pais Kòrsou.
Durante 4 siman kuminsando for di 7 di mei próksimo e beyesanan mundial lo haña e oportunidat di bishitá diferente parti di India i disfrutá di tur e lokualnan ku e Pais tin di ofresé.
Tambe nan lo partisipá na aktividatnan manera entre otro, shownan di gala, sekshon di fotografia, desfilenan di moda i tambe na e famoso “Fast Track kual ta konsistí di kompetensianan manera “Miss World Fashion-Top Model”, “Miss World Talent”, “Miss World Top Fitness-Sport Challenge”, “Miss World Multimedia Award”, “Head to Head Challenge” i “Beauty With A Purpose Challenge”. Ganadó di kada un di e kompetensianan aki, outomátikamente lo forma parti di e 40 semi-finalistanan pa e gran final.
E gran final di e 72 sertámen di “Miss World” ta proklamá pa tuma lugá dia 31 di mei próksimo na Hyderabad, i lo wordu transmiti pa mas di 100 País. Na final di e sertámen, e di 71 “Miss World” Krystyna Ryszková, prosedente di Czeck Republic lo Koroná su susesora.
Despues di Koronashon di e 72 “Miss World”, lo tin un cena di gala na unda lo anuncia e 6 ganadónan di “Miss World Continental”.
E dama kende lo wordu korona komo e próksimo beyesa mundial “Miss World”, lo tin e tarea pa durante un aña bishita diferente País rond mundu, hibando e mansahe kual e organisashon di Miss World ta para pe.
Nos Flamante “Miss World Curaçao” Shubrainy Dams aktualmente ta den preparashon hopi intensivo serka diferente profeshonal lokal.
ReProd(Reinilla Project Development) ta sumamente orguyoso ku un biaha mas Kòrsou lo bai tin un representante riba un nivel haltu i ta sigur di por konta ku apoyo di parti di e pueblo di Kòrsou.
