Amanda Verkerk di 19 aña di edat ta representá Kòrsou dignamente den e sertamen di Teen Universe 2025 i ta resultá di tres finalista den e kategoria Teen Universe 2025.
Otro yu di Kòrsou ta saka kara riba tarima internashonal i demostrá ku nos ta un isla yen di talento i hende muh nan bunita. Amanda Verkerk a sa di laga nòmber di Kòrsou zona un siman largu i krea un promoshon grandi pa nos. Tur kaminda ku Amanda a bishitá, el a hala hopi atenshon ku su bestuario i su personalidat.
QMQ Organization ta sumanete orguyoso ku e bon trabou ku Amanda a bin ta hasi durante su preparashonnan i ku a kulminá ayera. Amanda a pèrkurá pa Kòrsou haña un promoshon asina ku grandi, di kua nos no tin boka pa gradisí Amanda p’e trabou bon hasí aki. Aparte ku Amanda a sali di tres finalista, el a logra e título di Mihó presentashon den trahe di baño.
Den mesun rosea nos ke felisitá representante di nos dushi isla Aruba ku a resultá ganadó apsoluto.
Amanda durante ful e siman tabatin diferente aktividat kaminda el a lusi super bunita ku trahenan konfekshoná pa diseñadónan di Santo Domingo i Venezuela. Amanda a presentá un bunita trahe nashonal ku a hala basta atenshon, esaki a keda kreá speshialmente na Colombia pa Amanda por a lusi den e kompetensha. Durante e simannan ku Amanda tabata na Punta Cana el a pèrkurá pa kompartí via su retnan sosial, diferente video i potrètnan kaminda por a haña un bista di kiko tur tabata pasando i ku boso por a biba e momentunan importante kuné.
E sertamen a konsisti di un anochi di pre eliminar kaminda Amanda a pone den práktika tur loke e la siña serka profeshonalnan na Kòrsou pero tambe internashonal. Un biaha mas hasiendo un tremendo trabou. Un total di mas ku 60 hóben tabata riba esanario basá riba e diferente kategorianan ku tabatin pa ku e sertamen aki.
Den e kategoria di Teen Universe ku ta esun ku Amanda a kompeti den dje tabata tin un total di 27 hóben. Teen Universe ta un dje sertamennan di nivel haltu i esaki por a miré tambe ayera via YOUTUBE i nan páginanan ofisial. Mas di 10 mil persona a sintonisá e sertamen ayera.
Promé presentashon Amanda mester a introdusí su mes. E di dos presentashon tabata den trahenan di baño sumamente bunita di e organisahon i e último presentashon, tabata trahe di gala kombiná ku pregunta final.
QMQ Organization ta mas ku orguyoso di Amanda, un hóben determiná i ku ta kla pa kompetí den kualke sertamen internashonal di nivel haltu.
