Resientemente minister di Desaroyo Ekonómiko, sr. ing. Charles Cooper a firma un akuerdo di maneho nobo (beheersovereenkomst) ku Fair Trade Authority Curaçao (FTAC) pa e periodo di 2025 pa 2028. Firmamentu di e akuerdo nobo ta reforsá e kolaborashon i komunikashon struktural entre MEO ku FTAC i ta pone un base mas firme pa kontinuidat.
Den e akuerdo ta regla entre otro aspektonan di supervishon di minister i finansiamentu di e organisashon. FTAC ta e outoridat di kompetensia di Kòrsou ku ta hasi su trabou na un forma profeshonal i independiente. E ta enkargá ku ehekushon di e Lei di Kompetensia (P.B. 2016 no. 16) ku ta kontribuí na un mihó klima di invershon dor di supervishon riba e forma ku merkado ta funshoná. Mal funshonamentu di merkado por pone ku preisnan ta subi, kalidat di produkto ta malu i/òf tin masha tiki inovashon ta tuma lugá.
Manera indiká den e Lei di Kompetensia, FTAC ta publiká tur investigashon riba nan wèpsait: www.ftac.cw.
Riba e potrèt: presidente di bestür di FTAC, sra. Wedervoort i minister di Desaroyo Ekonómiko sr. ing. Charles Cooper.
