Organisashon Mundial di Salú (WHO) i Organisashon Panamerikano di Salú (PAHO) resientemente a emití un alerta pa un oumento di kasonan konfirmá di keintura hel den sierto paisnan den e region di Suramérika.
Tambe a nota un kambio den e distribushon geográfiko di e enfermedat. Lugánan ku no a tabata tin kasonan di keintura hel, ta mirando kasonan di keintura hel pa promé biaha, por ehèmpel na estado di São Paulo, Brasil, i departamento di Tolima, Colombia.
Resientemente Gobièrnu na Colombia a deklará estado di emergensia na nivel nashonal, pa motibu di oumento di kasonan di keintura hel.
Keintura hel ta un malesa infeksioso ku ta keda transmití dor di sangura. Un promedio di 10% di personanan ku keda kontagiá, ta fayesé a konsekuensia di e malesa aki. No tin tratamentu pa keintura hel, pero si tin un bakuna efektivo ku ta duna protekshon.
Ministerio di Salubridat di Kòrsou kier rekordá tur pèrsona ku ta bai di biahe pa un país di riesgo òf un país ku tin kasonan di keintura hel, pa bakuná mínimo 10 dia promé ku e fecha di biahe na Salubridat Públiko di Kòrsou (ántes GGD), na Piscaderaweg # 49 (Zakito). Mester traha un sita pa bakunashon kontra keintura hel.
Pa planiá un sita òf pa mas informashon:
Por yama Salubridat Públiko na e siguiente numbernan:
+5999 432-2860
+5999 514-2860 (WhatsApp tambe)
Paisnan di riesgo pa keintura hel:
Region di Amérika i Karibe:
Argentina, Bolivia, Brasil, Colombia, Ecuador, Guyana, Guyana Franses, Panama, Paraguay, Perú, Sürnam, Trinidad & Tobago i Venezuela.
Region di Afrika:
Angola, Benin, Burkina Faso, Burundi, Cameroon, Chad, Congo, Etiopia, Gabon, Gambia, Ghana, Guinea, Guinea-Bissau, Guinea Equatorial, Kenya, Kosta di Marfil (Ivoorkust), Liberia, Mali, Mauritania, Niger, Nigeria, Senegal, Repúblika Afrika Sentral, Repúblika Demokrátiko di Congo, Sierra Leone, Sudan, Sur Sudan, Togo i Uganda.
