Minister di Desaroyo Ekonómiko, ing. Charles Cooper, a biaha pa Europa e siman tras di lomba enkabesando un mishon komersial pa Hulanda i Spaña. Na Hulanda e tabata na Den Haag kaminda el a partisipá huntu ku Minister Plenipotensiario Carlson Manuel na un sena di trabou riba djamars 22 di aprel 2025 ku 26 embahador establesé na Den Haag. E sena tabata un re-enkuentro ku e embahadornan ku a bishitá Kòrsou na 2024 i 2025 komo parti di un evento titulá Curaçao Connects, pa konektá Kòrsou ku e paisnan aki i stimulá interkambio komersial i identifiká áreanan di kolaborashon i negoshi. Curaçao Connects ta un aktividat organisá pa Minister Plenipotensiario di Kòrsou Carlson Manuel ku sosten di MEO. E anochi a kana den un esfera positivo kaminda kada embahador a duna un bista na unda nan ta mira posibildat di koperashon i nan a komprometé pa move riba e akshonnan ku a kumbiní. Ta bai traha riba un programa di follow-up intenso entre MEO i Kas di Kòrsou pa logra kolaborashon riba komèrsio i invershon den áreanan di energia renovabel, Blue Economy, Edukashon, Wellness, Sektor Kreativo i IT.
Djárason 23 di aprel Minister Charles Cooper a biaha pa Madrid pa sigui ku e trabounan di buska oportunidatnan nobo pa empresanan di Kòrsou.
Minister Cooper a bishitá UN Tourism, e Organisashon Mundial di Turismo ku su sede prinsipal na Madrid, ku tabatin palabra di elogio pa e forma kon Kòrsou ta manehando su turismo i e forma supstansial ku el a bin ta krese. Nan a mustra riba e echo ku mester manehá e kresementu di un forma responsabel i duradero. UN Tourism ta ofresé diferente programa pa fasilitá akseso na konosementu i nan ta yuda ku guia pa realisá un turismo sostenibel.
Djaweps 24 di aprel Minister Cooper a bishitá Embahador di Reino na Madrid, su ekselensia Roel Nieuwenkamp. E bishita a bai den un esfera masha ameno i embahador Nieuwenkamp a reiterá ku Embahada di Reino tei pa Kòrsou tambe. Minister Cooper i Embahador Nieuwenkamp a palabrá di mantené otro informá di desaroyonan na ambos pais i ku riba un base regular funshonarionan di MEO lo por biaha pa mantené e relashonnan bilateral ku Spaña i lo por konta ku un ofisina na e embahada pa por hasi e trabounan di diplomasia komersial i pa mantené relashonnan di trabou ku entidatnan gubernamental di Spaña na benefisio di sektor empresarial di Kòrsou.
Ekonomia di Spaña te esun ku mayor kresementu den Europa aktualmente impulsá pa kresementu di Turismo. Esaki spesífikamente pa loke ta trata e sektornan di energia renovabel, digitalisashon i a base di imigrashon for di prinsipalmente Latinoamérika. Pa logra atraé turista for di Spaña, ta imperativo traha riba buelo direkto i tambe kadenanan di hotel Spañó. Tin hopi potensial pa hasi negoshi ku Spaña i Kòrsou tin servisio pa ofresé i tambe tin potensial pa atraé invershon for di Spaña.
Minister Cooper a presensiá tambe e momentu ku Ofisina di Turismo (CTB), Cinex i e Grupo di Invershonista CBS Asset Management S.L. i Via Appa Emerald S.L. a firma un karta di intenshon pa traha huntu pa yega na invershon di un kadena di hotel Spañó na Kòrsou. Esaki ta sigur un logro interesante di e bishita. E dia a finalisá ku un sena di negoshi ku mas di 35 empresario influyente di Spaña komo invitadonan di Minister di Desaroyo Ekonómiko, Charles Cooper. E interkambio tabata interesante i tabatin posibilidat amplio pa netwerk ku empresarionan di Kòrsou ku tambe tabata presente. E bishita na Madrid a kontinuá djabièrnè mainta ku un konferensia di negoshi “Conferencia de Negocios Curaçao – España 2025”. E konferensia a trese huntu ekspertonan i empresarionan di Spaña i Kòrsou pa interkambiá ku otro tokante e posibilidatnan di hasi negoshi entre Kòrsou i Spaña.
Minister Cooper a hasi apertura ofisial di e konferensia mustrando riba e oportunidatnan real i tambe a duna un bista di kon Gobièrnu ta fasilitá e invershonista pa e ta eksitoso na Kòrsou. Den su spich Minister Cooper a usa e metáfora di e apelsina di Valencia ku e spañonan a yega Kòrsou kuné pa kultivá, pero ku a bira un apelsina zür ku no por a kome (e konosido larahá), pero ku si por a traha e likor famoso Blue Curaçao ku te awe ta keda produsí i ta konosí rònt mundu. Esaki ta un ehèmpel di kon Kòrsou ku Spaña por krea kosnan huntu. E bishita na Madrid a finalisá djabièrnè mèrdia ku un networking cocktail ku tur partisipante na e konferensia i un seshon di ‘match making’ durante kua por a yega na palabrashonnan konkreto entre e partisipantenan.
Minister Cooper a konkluí su bishita na Europa djabièrnè 25 di aprel i a regresá Kòrsou durante wikènt satisfecho ku e trabounan desplegá.
