Durante su bishita na Kòrsou, Minister di Asuntunan Ekonómiko di Hulanda, señor Dirk Beljaarts, a haña e oportunidat pa sera konosí di aserka ku e desaroyo di e programa di hidrógeno di Kòrsou.
Riba 24 di aprel 2025, Minister Beljaarts a risibí un presentashon amplio for di e presidente di e grupo di trabou Offshore Floating Wind, señor Ramon Chong di Ministerio di Desaroyo Ekonómiko. Den e presentashon, señor Chong a detayá henter e trayekto di desaroyo di e programa di hidrógeno, inkluyendo su importansia stratégiko pa nos isla.
Entre 14 i 16 di aprel, un delegashon amplio ku representantenan di Gobièrnu di Hulanda, institutonan di konosementu manera TNO, i sektor privá a reuní na Kòrsou. Durante e siman di trabou, nan a diskutí e stapnan konkreto pa e desaroyo di e programa di hidrógeno, ku tambe a ser kompartí ku Minister Beljaarts.
Minister Beljaarts a ekspresá su gratitut pa e oportunidat di haña un bista profundo di e programa ku e gobièrnunan di Kòrsou i Hulanda a bini ta traha huntu riba dje. E programa ta salí for di e MoU (Memorandum of Understanding) firmá na mei 2023, siguí pa e firmamentu di e Hoofdlijnenakkoord na mei 2024. Ambos dokumento ta deliniá un kaminda konkreto pa e futuro di produkshon di energia sostenibel di Kòrsou.
