Djarason 30 di Aprel 2025, den presensia di Minister Charles Cooper, representantenan di Gobièrnu, sektor privá i sindikatonan i tambe empresarionan i partnernan invitá, Korpodeko a selebrá su di 40 aniversario ku un evento speshal. E selebrashon tabata un momento ameno pa reflehá riba e impakto di Korpodeko durante e último 4 dékadanan i kompartí plannan pa futuro. Banda di esei a introdusi Korpodeko su lema i jingle nobo.
Durante e anochi festivo, e temanan sentral tabata impakto, kresementu i desaroyo. Públiko presente por a disfrutá di palabranan inspirativo di e direktor interino Sr. Gerald Stacie, presidente di direktiva Sr. Dudley Lucia, un èks-miembro di direktiva Sr. Elias i Minister interino di Asuntunan Ekonómiko, Sr. Charles Cooper. Tur orador a tira lus riba kon nan ta mira e ròl i balor di Korpodeko pa desaroyo na Kòrsou i a enfatisá e importansia di konfiansa i koperashon.
Sr. Stacie den su desertashon a para ketu na e aniversario i Korpodeko su metanan pa sigui konstruí riba e fundeshi fuerte di 40 aña di eksistensia.
Dudley Lucia, presidente di direktiva, a remarká ku na Korpodeko, 1 meta semper a keda sentral durante e 4 dékadanan. Korpodeko a empoderá empresarionan grandi i chikí pa sigui nan soño i transformá nan soño den negoshinan próspero. For di ideanan ku ta nase riba mesa di kushina, te empresanan grandi ku ta duna oportunidat na hopi hende pa ehersé un trabou I yuda den kresementu di nos ekonomia, Korpodeko tabata un partner di konfiansa kada paso di e kaminda.
Shurmel Elías, èks-miembro di direktiva, a para ketu na e introdukshon di produktonan i servisionan manera Mikro Fiansa i Go Green i e sosten via di Mi Negoshi, ku a duna empresarionan lokal apoyo vital den momentunan krítiko. Ela a kompartí ku “Transformashon ta kontinuo, i Korpodeko ta prepará pa sigui liderá ku empatia, strategia i servisio.”
Ministro Charles Cooper a ekspresá su sosten i apresio pa e papel ku Korpodeko ta hunga den ekonomia lokal i a enkurashá un i tur pa sigui traha den espíritu di koperashon publiko-privá.
E selebrashon di 40 aña no solamente a honra e pasado kaminda Korpodeko tabata sentral di di finansia proyektonan manera Jan Thiel, Sta. Barbara, Pietermaai, i varios hotel, però tambe a pone énfasis fuerte riba futuro di e institushon, ku enfoke riba adaptabilidat i inovashon pa sigui kontribuí ku progreso duradero di Kòrsou.
Korpodeko, na su 40 aña, ta kla pa sigui su mishon komo partner di konfiansa den desaroyo sosio-ekonómiko, semper banda di empresarionan ku tin kurashi pa soña grandi. Korpodeko… Kompolaga!
