Kondukta no deseá i komportashon hostil na boka di trabou por kondusí na pèrdida di miyones pa aña na ekonomia di Kòrsou i tin komo konsekuensia pèrdida di produktividat, un grado di apsentísmo elevá i renunsia di empleadonan kalifiká. Asina Raúl Henriquez, direktor i sekretario general di Konseho Sosial Ekonómiko (SER) a enfatisá durante un seminario públiko ku a tuma lugá djamars 29 di aprel último den aula di Universidat di Kòrsou (UoC), organisá pa e entidat OneCare.
Segun datonan resién di un enkuesta, mas ku 80% di e empleadonan enkuestá na Kòrsou tin eksperensia ku algun forma di komportashon no deseá na nan trabou, inkluso kasonan di akoso, intimidashon òf agreshon verbal. Mas ku mitar di nan a indiká ku nan sa mèldu malu pa motibu di esaki, i mas ku un tersera parte hasta a kita for di trabou. “Ta evidente ku aki no ta trata di kasonan aislá,” asina Henriquez a duna di konosé, “sino di un fenómeno struktural i subestimá ku tin konsekuensianan makroekonómiko signifikante.”
Prognóstikonan ta indiká ku inseguridat sikososial den ámbito di trabou tin un impakto ekonómiko konsiderabel. Den un ekonomia manera esun di Kòrsou —ku un forsa laboral aktivo, komparativamente limitá, i un dependensia fuerte di sektornan manera turismo,hospitalidat, konstrukshon — e pèrdidanan aki ta representá un patronchi di riesgo. “Un kultura di trabou tóksiko ta tradusí su mes direktamente den produktividat limitá, daño di reputashon i pèrdida di kapital humano,” asina Henriquez a alertá. Estudionan internashonal i datonan regional ta enfatisá esaki.
Komo e órgano konsultivo mas haltu den asuntunan sosioekonómiko di pais, SER ta urgí tur entidat públiko, partnernan sosial i organisashonnan sivíl pa tuma akshon konhunto den promoshon di un ambiente di trabou mas sigur. Den su diskurso, Henriquez a suprayá e nesesidat di kodifikashon legal di protekshon sikososial, reforsamentu di strukturanan di raportá i invershonnan mas grandi den prevenshon, formashon di empleadonan i supervishon. “Seguridat sosial i sikológiko na boka di trabou no ta un opshon boluntario. Invertí den un kultura laboral saludabel i respetuoso ta práktikamente un invershon den produktividat, resilensia i progreso kolektivo,” asina e direktor di SER a reafirmá.
E seminario — ku a konta ku presensia di representantenan empresarial, laboral, akadémiko, edukashonal i gruponan sosial — ta forma parti di un kampaña mas amplio, inisiá pa OneCare i SER pa sensibilisá i promové maneho públiko ku ta garantisá un ambiente di trabou digno i sigur na Kòrsou.
