Dia 5 di mei último, a tuma lugá soft opening di Parasasa Hotel Curaçao. Parasasa Hotel Curaçao ta un hotèl di práktika (leerhotel) ku ta konsistí di 37 kamber di dos persona i 8 suites. Despues di un renobashon profundo di e edifisio, e hotèl di práktika a habri su portanan i pronto ta kuminsá risibí bishitantenan internashonal i lokal. Den e hotèl di práktika, studiantenan di Nilda Pinto SBO, Maris Stella SBO i Universidat di Kòrsou Dr. Moises Da Costa Gomez (UoC) ta haña e oportunidat pa siña i ehersé diferente funshon ku tin den un hotèl bou di guia di dosentenan i profeshonalnan ku eksperensia riba e área di hospitalidat. E hotèl di práktika ta un inisiativa di e fundashon Curaçao Hospitality and Tourism Training Centre (CHTTC) kual ta un kolaborashon entre ROC Mondriaan di Den Haag, Ofisina di Turismo di Kòrsou (CTB) i Curaçao Hospitality & Tourism Association (CHATA). Durante di e soft opening a hiba palabra Minister di Desaroyo Ekonómiko, sr. Charles Cooper, Presidente di hunta ehekutivo di ROC Mondriaan, sr. Hans Schutte, Direktor di CTB, sr. Muryad de Bruin i Direktor Sektor di Enseñansa i Siensia na Ministerio di Enseñansa, sr. Wladimir Kleinmoedig.
Apertura di Parasasa Hotel Curaçao ta duna un kontribushon na desaroyo di e estudio di Hospitalidat riba nivel MBO i tambe HBO. E hotèl di práktikata brinda e oportunidat ideal pa e studiante haña eksperensia den e trabou dor di duna servisio na turistanan real den un ambiente di práktika. Di e manera aki e studiante ta haña e oportunidat pa sigui desaroyá su abilidatnan. Ademas e kolaborashon estrecho entre ROC Mondriaan i skolnan na Kòrsou ta reforsá e enseñansa ku ta keda brindá na studiantenan. Studiantenan di SBO ta haña e oportunidat pa ehersé tareanan real den e hotèl bou di instrukshon i guia di dosentenan. Studiantenan ku ta sigui e estudio di Turismo tin e oportunidat pa siña tambe pafó di e hotèl di práktika den e industria di turismo. E estudionan ta kumpli ku e petishon aktual di e industria di hospitalidat i turismo dor ku ta hasi uso di konosementu i eksperensia for di e industria mes. Danki na e ambiente úniko di siña ku ta keda brindá den e hotèl di práktika, studiantenan di Kòrsou awor por sigui un training di balor haltu lokalmente, ku perspektiva pa nan karera di futuro. Studiantenan ku terminá SBO por skohe pa sigui pa nan estudio na UoC òf bai traha i start ku nan karera profeshonal den e industria di hospitalidat i turismo. Adishonalmente, Parasasa Hotel Curaçao ta risibí tambe studiantenan for di region Karibe i Hulanda ku ta skohe pa bin Kòrsou i haña eksperensia real den e hotèl di práktika.
Durante di e seremonia esnan presente a haña e oportunidat eksklusivo pa drenta den e hotèl di práktika, Parasasa Hotel Curaçao i atmirá e kambernan di dos persona, suites i e diferente fasilidatnan.
