Riba djamars 6 di mei 2025, Konseho di Minister di Kòrsou a reuní ku un delegashon di e Komishon di Relashonnan di Reino di Kámara di Representantenan di Hulanda, kaminda a enfoká riba e situashon polítiko aktual i kolaborashon den Reino.
E delegashon tabata konsistí di miembronan di Parlamento sr. Raoul White (GroenLinks-PvdA), sra. Aukje de Vries (VVD), sr. Mpanzu Bamenga (D66), sr. Don Ceder (ChristenUnie) i griffier di komishon sra. Eva Meijers. Di parti di Representashon di Hulanda na Willemstad tabata presente sra. Saskia de Reuver, Direktor di Paisnan i representante interino di Hulanda na Aruba, Kòrsou i Sint Maarten.
Durante di e enkuentro, e delegashon di Kámara a felisitá e ministernan ku resultado di e elekshon tras di lomba. E delegashon a indiká ku awor ta un momentu oportuno pa tantu Hulanda komo Kòrsou huntu reflehá riba e futuro di koperashon denter di Reino. Nan bishita na e region ta parsialmente motivá pa yega na konsientisashon di e responsabilidat kompartí akí.
A para ketu tambe riba e importansia di kolaborashon basá riba igualdat i rèspèt mutuo. Den e konteksto ei a pone énfasis riba refinansiamentu di e fiansa di bono di Kòrsou i e konseho resientemente duná pa Kolegio di Supervishon Finansiero (Cft). Den e konseho akí ta rekonosé ku refinansiamentu na e momentunan akí ta hustifiká i nesesario pa garantisá stabilidat finansiero.
E ministernan alabes a pidi atenshon pa e posibel konsekuenshanan negativo di e plannan di Hulanda pa oumentá e impuesto aéreo riba buelonan di distansia largu. Segun nan, esaki por tin impakto grandi riba aksesibilidat di nos isla i riba e sektor turístiko, ku ta di gran importansia ekonómiko pa Kòrsou.
Finalmente, a trata temanan tambe manera desaroyo ekonómiko i e oportunidatnan ku hidrógeno bèrdè ta ofresé pa kresementu sostenibel den region.
