Ounke mayoria hende konosé Dia di Mama, poko hende sa di Dia di Mama en duelo; un dia dediká na honra mamanan ku a pèrdè un embaraso òf yu. E dia aki ta duna espasio pa mamanan ku a eksperensiá pèrdida risibí konsuelo, rekonosementu i sosten.
Dia di Mama en duelo ta wòrdu selebrá riba e promé djadumingu di mei, un siman promé ku Dia di Mama tradishonal. E dia aki a kuminsá na aña 2010 na Australia kaminda un mama ku konosé pèrdida di yu kier a krea un dia pa honra tur e mamanan ku mester biba aki na mundu, ku e falta di nan yunan.
E propósito di e dia aki ta pa trese konsientisashon tokante e doló silensioso ku hopi hende muhé ta karga i pa duna nan un momentu di rekonosementu, amor i komprenshon. Dia di Mama en duelo no tei pa remplasá Dia di Mama tradishonal pero pa komplementá esaki, ku kompashon pa esnan ku ta biba un maternidat marká pa pèrdida.
Na aña 2024, The Losing Zayn Gaining An Angel Foundation tabatin e honor di a organisá un evento honrando Dia di Mama en duelo pa promé biaha na Kòrsou huntu ku ‘Lisle’s Foundation’. E aña aki nan a organisé di forma independiente, kontinuando ku e mesun kompashon i kompromiso.
E atardi a tuma lugá na Kurá Hulanda Conference Center kaminda tabatin 3 orador, inkluyendo Pastora Jeridy Coco, ken tambe ta un mama en duelo ku a duna lus na un yu sin bida 31 aña pasá. Pastora Jeridy no a papia religiosamente sino komo un ser muhé i komo un mama ku a kompartí su propio historia di pèrdida i di sanashon. Su palabra a toka hopi kurason.
Esaki tabata un eksperensia sumamente bunita i signifikativo. E mayornan a haña konsuelo, konekshon i motivashon den nan kaminda di luto i nan ruta pa sanashon. Un ambiente yen di kompanshon i sosten kaminda sinkuentisinku mama por a asistí kompletamente gratis.
