Un grupo di partner Europeo, resientemente presente na Kòrsou pa reunión inisial ofisiál di e Proyekto EmpowHer Erasmus+, a hasi un bishita di kortesia serka Minister di Desaroyo Ekonómiko di Kòrsou, Sr. Charles Cooper.
E bishita ta marka un momentu importante den lansamentu di EmpowHer, un inisiativa finansiá pa e programa Europeo, Erasmus+, ku ta enfoká riba empoderá muhénan hóben i fortalesé kapasidat di trahadónan hubenil na Europa i den Karibe. E proyekto ta uní partnernan di Italia (Partner Prinsipal), Spaña, Montenegro, Kosovo, Albania i Kòrsou den un esfuerso kolektivo pa promové igualdat di género, entrepreneurship, partisipashon inklusivo i enseñansa transnashonal. E proyekto ta finansiá pa UE i ta un di e resultadonan di e esfuersonan kontinuo di EU Desk Kòrsou pa oumentá konosementu di oportunidatnan i mehorá posibilidatnan di finansiamientu Europeo pa organisashonnan lokal di Kòrsou.
Durante e reunion ku Minister Cooper, e grupo a presentá e vishon, metanan i aktividatnan planiá di e proyekto, enfatisando e ròl stratégiko di Kòrsou komo un liason entre perspektiva Europeo i Karibense riba desaroyo di hóben i igualdat di género.
“Nos ta honrá di risibí nos partnernan internashonal riba nos isla i orguyoso pa kontribuí na un proyekto ku ta pone empoderamentu di hende muhé den sentro di innovashon, edukashon i kambio sosial,” asina Minister Charles Cooper a splika. “Kòrsou ta keda komprometé na fomentá kooperashon internashonal ku ta krea oportunidatnan konkreto pa nos pueblo.”
E reunion Inisial, ku a tuma lugá di 5 te 8 di mei 2025, a inkluí seshonnan di planifikashon stratégiko, tayer i aktividatnan di interkambio kultural. E evento ta pone e tono pa e proyekto di tres aña, ku lo inkluí programanan pa desaroyákapasidat, interkambio virtual i inisiativa basá riba komunidat. E meta final ta pa ekipá hende muhé i profeshonalnan sosial ku e abilidatnan pa prosperá den un mundu ku ta kambia rápidamente.
E bishita a finalisá ku un foto huntu ku Minister Cooper, simbolisando e spiritu di kooperashon i kompromiso kompartí ku ta un di e balornan klave di e programa Erasmus+.
Pa mas informashon, por tuma kontakto:
Ministerio di Desaroyo Ekonómiko Kòrsou; EU Desk Kòrsou.
