Pa e promé biaha, ku un delegashon ofisial di Parlamento di Kòrsou ta partisipá na e konferensia anual di ParlAmericas, ku ta tuma lugá for di 27 te 29 di mei 2025 na Montevideo, Uruguay. Kòrsou a risibí un invitashon spesial pa partisipá komo bishita honorario, un paso importante pa sigui fortalesé su presensia den diálogo parlamentario internashonal.
E tema prinsipal pa e di 21 Asamblea Plenario i e di 9 enkuentro “de la Red Parlamento Abierto” ta “Legislando para el futuro: la gobernanza anticipatoria en la acción parlamentaria”. (Legislashon ku mira pa futuro: gobernashon antisipá den funshonamentu parlamentario”).
Durante e tres dianan aki delegashonnan di Parlamento di mas di 30 pais lo diskutí tokante e posibilidatnan pa adaptashon di legislashon ku por antisipá riba kambionan sosial grandi manera interupshon teknológiko, kambio di klima, polarisashon i transishonnan demográfiko.
E programa di e promé dia ta enfoká riba “Parlamentonan di Futuro: antisipashon, inovashon i akshon”, ku seshonnan interaktivo riba:
• Perspektiva di futuro i siensia di Parlamento;
• Uso di prospektiva stratégiko den Parlamento.
E delegashon di Kòrsou ta konsistí di e siguiente miembronan:
• Sr. Fergino Brownbill ku ta Presidente di Parlamento i alabes hefe di e delegashon;
• Sr. Rámon Yung, vise Presidente di Parlamento
• Sra. Giselle Mc William, miembro di Parlamento pa frakshon di MAN-PIN;
• Sra. Maria Nita, miembro di Parlamento pa frakshon di MFK;
• Sr. Ruisandro Cijntje miembro di Parlamento pa frakshon di PNP; i
• Sr. Shaheen Elhage, miembro di Parlamento pa frakshon di PAR.
