Un atvertensia general ta bai na tur suidadano di Kòrsou, pa tene kuenta ku lunanan di mei i yuni, ta e temporada ku mas intensidat di santu di Sahara riba nos isla. Netamente e siman aki, di akuerdo ku pronóstiko, e santu di Sahara aki lo pasa riba nos isla i lo por okashoná molèster visual i molèster serka esnan ku sierto malesa respiratorio.
Kada aña di nobo nos ta keda konfrontá ku e fenómeno di santu di Sahara for di kontinente Afrikano. E ta un molèster pa hende pero un faktor importante den ekologia mundial komo ku e santu ta kontené nutriente ku ta fertilisá por ehèmpel selva di Amazona i bida marino. Pero e santu ta influensiá tambe kalidat di e airu ku nos ta respirá i por okashoná difikultat respiratorio leve serka sierto hende. Esaki komo ku huntu ku e santu (stòf) tin otro komponentenan orgániko i kímiko ku tambe ta sirkulá den airu. E materialnan aki por oumentá alergia di un persona òf kousa síntoma di problema respiratorio.
Aki algun prekoushon ku nos por tuma
Personanan ku tin difikultat ku respirashon i òf alergia mester tuma e siguiente prekoushonnan durante e dianan ku tin e santu di Sahara riba Kòrsou:
• Keda mas tantu posibel den kas ku bentana será òf espasio será.
• Ku ta posibel evitá uzo di fèn, paso esaki ta produsí koriente di airu ku ta plama e partíkulanan.
• Kontrolá i ku ta nesesario laba filternan di èrko di kas i di outo regularmente.
• Limpia mueblenan di kas ku un paña muhá pa kita stòf. Evitá di sakudí e paña pa no plama stòf den kas.
• Si bo ta sufri di alergia, uza e remedinan anti-alérgiko ku dòkter a preskribí pa bo.
• Tene bentana di outo será i uza èrko mas tantu posibel ku esaki ta disponibel.
Pa mas informashon tokante bo salú relashoná ku e santu di Sahara, semper por tuma kontakto ku bo dòkter di kas.
