Plataforma di sostenibilidat KoRRRsou a lansa un kampaña nobo ku ta trese huntu baile, kreatividat i konsientisashon di medio ambiente.
E KoRRRSou Dance Challenge ta reta tur skol básiko i sekundario na Kòrsou pa pone atenshon na separashon di shushi pa medio di músika i moveshon.
E skol ganadó lo risibí un presentashon bibu di artistanan popular Jada & Tyziano dia 27 di yüni 2025, i tambe un baki grandi di resiklahe pa e kurá di skol.
Partisipantenan ta krea un video di baile di e jingle ofisial di KoRRRSou, ku ta enfoká riba e palabranan Resiklá, Reusá, Redusí. E videonan lo wòrdu publiká riba TikTok, Instagram òf Facebook ku un tag pa e pagina ofisial di @korrrsou. E partisipantenan lo wòrdu husgá riba kreatividat, energia i e poder di e mensahe sostenibel. E último dia pa partisipá ta 20 di yüni 2025.
KoRRRsou ta un kampaña di konsientisashon amplio ku tin komo meta pa inspirá e komunidat di Kòrsou pa wak shushi diferente: no komo un problema, pero komo un materia prima ku tin balor. E nòmber ta para pa e tres R’s: Reusá, Resiklá i Redusi. E kampaña ta usa kampañanan di komunikashon inovativo, edukashon, músika i aktividatnan den komunidat pa enkurashá komportashon konsiente di medio ambiente i hasi e tema aksesibel i atraktivo – spesialmente pa hóbennan.
Un parti importante di e kampaña ta e wèpsait nobo www.korrrsou.com. E hub online aki ta ofresé hèrmèntnan práktiko, tep i inspirashon pa manehá desperdisio mihó. E informashon riba e sitio ta yuda e residentenan pa separá i redusí nan desperdisio, pa wak diferente kiko nan ta tira afó, i pa hasi eskohonan konsiente pa un futuro mas sostenibel – pa nan mes i e generashonnan ku ta sigui.
Mas informashon tokante e KoRRRSou Dance Challenge, e kampaña i tur materialnan edukativo disponibel por wòrdu hañá na: www.korrrsou.com
