Dia 29 di mei 2025 tabata e último dia di e konferensia anual di ParlAmericas na Montevideo, na kual un delegashon di Parlamento di Kòrsou a partisipá. Durante e enkuentro di tres dia, e delegadonan di Kòrsou a partisipá na diferente seshon interaktivo, interkambiá di konosementu i hiba diskushonnan ku parlamentarionan di Latino Amérika, Karibe i Nort Amérika, riba temanan manera interupshon teknológiko, kambio di klima, polarisashon i transishonnan demográfiko.
E tema prinsipal pa e di 21 Asamblea Plenario i e di 9 reunion di e ret di Parlamento Habrí tabata “Legislando para el futuro: la gobernanza anticipatoria en la acción parlamentaria”. (Legislashon ku mira pa futuro: gobernashon antisipá den funshonamentu parlamentario).
Na fin di e Asamblea, a skohe un Hunta di Direktiva nobo di ParlAmericas, ku ta konsistí di representantenan di diferente pais den region, manera Saint Lucia i Colombia.
E delegashon di Kòrsou lo relatá na Parlamento di Kòrsou na su regreso. A base di e relato aki, Parlamento lo disidí si e kier forma parti di ParlAmericas komo miembro.
Esaki tabata e promé biaha ku un delegashon di Parlamento di Kòrsou a partisipá na e konferensia anual di ParlAmericas, ku a tuma lugá di 27 pa 29 di mei 2025 na Montevideo, Uruguay. Kòrsou a risibí un invitashon spesial pa partisipá komo invitado honorario.
