Ku e meta: “UNI FAMIA i duna chèns pa konosé otro mihó”, e komishon di taki di Pa Phelipie Cijntje a kuminsá un trabou duru, pero dushi, na aña 1997 pa traha riba kolekshon di informashon tokante e taki(nan) familiar.
Na 1998, 3 otro taki di e matrimonio Johannes Cijntje i Petronella Climaka Lourens tambe a kaba nan palu ginekológiko. 25 aña despues di e promé enkuentro, taki di Pa Phelipie i miembronan di e famia grandi di Cijntje a bolbe bini huntu komo famia riba 23 di desèmber 2022.
Durante e enkuentro aki a homenagiá 4 miembro di famia Cijntje ku a destaká den nan ramo, kende ta minister Ruisandro Cijntje, Miss Kòrsou Shariangela Cijntje i beisbolero profeshonal Jurrangelo Cijntje i baluarte grandi di nos komunidat Armando Huerta ku su 40 aña den farándula.
Durante e evento festivo Famia Cijntje a sosialisá, a saka portrèt den frame, a kanta i deklamá, a haña splikashon di orígen di takinan di Cijntje ilustrá riba pantaya grandi, a proyektá e evento bibu via Zoom pa miembronan di famia na Hulanda, a homenagiá 4 miembro di famia, a kompartí un gesto memorabel, a pasa grabashonnan di historia familiar, a kome i bebe i a terminá e anochi ku baile i músika.
E komishon ta spera ku den futuro mas persona ku ta forma parti di e famia grandi di Cijntje lo uni pa kompartí rekonosementu na miembronan di famia, forma laso di union familiar i bai bèk 8 generashon, di mama ansestral te na bo mes komo persona ligá na e famia grandi ku ta kuminsá na mama Francijntje (1768 – 1860) di plantashi Sabaneta.
