Resientemente Minister van Heydoorn a risibí bishita di dr. Guido Rojer, Jr. kende a keda rekonosé for di sentenáres di sientífiko rònt mundu pa Academy of International Business (AIB) ku beka finansiá pa Boeing Institute pa partisipá den nan Junior Faculty Consortium (JFC) na Seoul, Korea.
AIB ta un di e tòp 3 organisashonnan akadémiko na mundu den ramo di atministrashon empresarial (huntu ku Strategic Management Society Academy of Management). Anualmente nan tin konferensia mundial i ta organisá trayekto spesial pa investigadónan i dosentenan prometedor den forma di Paper Development Workshops i tambe JFC. Sr. G. Rojer a keda selektá pa partisipá na e konferensia anual di AIB na Seoul, Sur Korea.
E ta dosente universitario na Fakultat di Siensianan Sosial i Ekonomia di University of Curaçao i ta spesialisá riba internashonalisashon di empresa isleño. E ta promé yu di Kòrsou pa keda rekonosé komo Junior Faculty pa AIB. “Promé di hopi” el a bisa ku konfiansa. Inspirá pa Hensley Meulens den Beisbol, Rojer a bisa: “Mi ta trahando duru pa mas yu di Kòrsou, espesialmente esnan ku studia serka mi pa logra kosnan uniko”. Apesar di tur posibel desafio ku nos tin komo pais chiki i falta di rekurso ku ta forma nos realidat, nos sa di perseverá pa nos yega ekselensia.
Minister di ESKD sr. Sithree van Heydoorn a deseá sr. Rojer turkos bon na Korea i a keda sumamente kontentu ku e bishita i tur e informashon.
