Algun skol a partisipá na sèptèmber último na un proyekto piloto pa traha Pruebanan pa Monitoriá Alumno di forma digital pa e materianan Papiamentu i Hulandes.
Alumnonan di Mgr. Niewindt College, St. Antonius College, St. Paulus College i Kolegio Sta. Rosa de Lima por a ‘log in’ ku nan datonan personal na e pruebanan riba nan aparato digital i asina a traha esakinan. Di e forma akí e resultado di e alumno ta bira konosí mes ora pa e maestro i, den kombinashon ku resultadonan di otro pruebanan, e por traha un plan di aserkamentu mes ora pa sera burakunan den enseñansa òf pa sòru pa material di estudio mas profundo.
Anualmente ta traha e Pruebanan pa Monitoriá Alumno pa asina por sigui e desaroyo i mes ora por duna guia kaminda tin mester. Esaki ta di gran importansia, pasobra di e manera akí e burakunan den enseñansa no ta bira muchu grandi i por evitá pèrdida di motivashon. E alumnonan tabata sumamente entusiasmá despues di a traha e prueba i e maestronan a indiká ku nan tabatin e imprenshon ku e alumnonan a traha e pruebanan di forma mas konsentrá i ku mas plaser.
Banda di e skolnan akí algun otro skol tambe a traha e Pruebanan pa Monitoriá Alumno (Skol básiko Elis Juliana, Schotborghschool, Kolegio San Martin de Porres i Heilige Familie College). A base di e resultadonan akí por a tèst e portal nobo ku a desaroyá pa maestronan. Tiki tiki lo sigui implementá e portal akí te ora ku tur skol tin e posibilidat pa traha e Pruebanan pa Monitoriá Alumno di forma digital.
E ministerio di ESKD i ETE ke gradisí e skolnan piloto di kurason pa nan koperashon i nan pasenshi durante e trayekto akí, pasobra ora ta purba proyektonan nobo semper ta surgi algun problemanan chikitu ku mester atendé.
Pero pa medio di e tèst akí nos alumnonan por yega na traha e pruebanan akí na un manera mas fásil den futuro.
