Ku hopi orguyo, a finalisá e prome parti di e proyekto “Ban Ariba Hoben”. E proyekto a konkluí ku un presentashon grandi ku a mustra e talentonan di e hóbennan. E evento, organisá na New Song College, a pone riba esenario e trayekto ku hóbennan di varios bario di Kòrsou ku a eksplorá nan raís kultural i desaroyá nan talento artístiko.
For di luna di sèptèmber hóbennan por a inskribí pa e proyekto kaminda nan por a siña diferente disiplina, arte, baile, músika i drama. Na òktober a kuminsá ofisial ku e “Masterclass” nan despues di skol na Marie Stella VSBO na Montaña i New Song College na Suffisant. Hóbennan ku a inskribí, a sigui e trayekto bou di guia di instruktornan renombrá.
Arte na enkargo di Omar Sling ku a guia e hóbennan den traha skulpturanan 3D, Baile na enkargo di Clint Gosepa ku a pasa den e hóbennan den baile tradishonal manera wals i mazurka, Drama a wòrdu duná dor di Jefrey Tromp ku a siña a hóbennan diferente téknika di aktuashon i músika tabata na enkargo di Calviany Eleonora ku a bai profundo den e area di tambú, no solamente kon pa toké pero su orígen tambe. E seshonnan aki tabata diseñá pa konektá hubentut ku e rikesa di historia di Kòrsou
Anochi Final
E proyekto a finalisá ku tur e hobenan ku a partisipá a hasi diferente presentashon den e disiplinanan ku nan a sigui, e hóbennan di baile di Suffisant a uni huntu ku e hóbennan di baile di Montaña i a presentá un baile original riba e kantika “Sakado” di Kevv i Luis Moka. Pa e hóbennan di arte tabatin a krea un galeria i a mustra e diferente skulpturanan 3D ku nan a krea. Hóbennan di drama a presentá un obra ku nan mes a skibi, dirigí i aktua aden i e hóbennan di músika dor di un video ku nan a graba den nan lastu lès a presentá 2 video di músika tradishonal.
E proyekto a demonstrá e poder transformativo di edukashon kultural. Partisipantenan a ekspresá nan konekshon ku e erensia di Kòrsou atrabes di varios forma di arte i a gana konfiansa i orguyo pa di nan identidat.
Inspira Canva ta sumamente orguyo ku resultado di e proyekto i ta wak pa dilanti pa amplia e proyekto i duna mas hoben e chèns pa siña mas di arte, músika, baile i drama.
