Dia 11 di Desèmber 2024, e promé enkuentro di ‘stakeholders’ a tuma lugá pa e promé partisipashon di Kòrsou den City Nature Challenge, un kompetensia internashonal ku a kuminsá na 2016 komo un kompetishon amigabel entre Los Angeles i San Francisco. Entretantu, e evento ta konosí rònt mundu, ku mas ku 800 siudatnan partisipando. E tema pa e di 10 aniversario den 2025 ta: “Bring the Globe Together for Biodiversity”.
E meta? Involukrá mas tantu hende posibel den dokumentashon di biodiversidat i huntu krea un database ‘crowdsourced’, ku ta yuda sientífikonan monitoreá kambionan den naturalesa den tempu real. Entre 25 pa 28 di aprel 2025, abitantenan di Kòrsou por kapta mata, bestia, piská, insektonan i otro organismo salbahe ku yudansa di e aplikashon grátis ObsIdentify.
Un Oportunidat Úniko pa Kòrsou
Ku su estreno den City Nature Challenge, Kòrsou ta pone su rikesa di biodiversidat den spotlight. Esaki ta un chèns pa siña konosé i dokumentá nos naturalesa mas mihó, tantu riba tera komo bou di awa.
Nadina Galle, ingeniero ekológiko, National Geographic Explorer i ko-organisadó, ta enfatisá:
“Nos naturalesa no ta solamente un atrakshon turístiko, pero tambe un parti integrá di nos identidat di Kòrsou. Ku partisipashon den e proyekto aki, nos no ta solamente protehá nos biodiversidat úniko, pero tambe nos ta mustrá kon importante nos naturalesa ta pa generashonnan ku ta bini.”
Cindy Eman, researcher i fundadó di Yu di Tera, ta agregá:
“City Nature Challenge ta duna nos un bon chèns pa selebrá nos naturalesa i kompilá dato balioso. Esaki ta siensia di siudadano den akshon: siensia i komunidat ta bin huntu pa un meta komun.”
Femi Meaux, fundadó di Hòfi Cas Cora, ta suprayá e importansia di kolaborashon:
“Traha huntu ta esensial pa logra kambio. Ku City Nature Challenge, nos ta mustrá loke ta posibel ora ku nos komo komunidat uní forsa.”
Kon Bo Por Partisipá?
Partisipá ta fásil i divertido:
- Deskargá e aplikashon ObsIdentify via App Store òf Google Play.
- Saka portrèt di mata, bestia, insektonan òf otro organismo salbahe entre 25 i 28 di aprel 2025.
- Upload bo opservashon nan den e app i yuda huntu forma un mapa di biodiversidat di Kòrsou.
- Bo ke hasi mas? Registrá komo boluntario òf partner via [email protected].
Nos ta Buska Kolaboradó!
Pa hasi e promé partisipashon di Kòrsou un éksito, nos ta buskando:
- Skolnan i dosente: Pa involukrá studiante den ‘citizen science’.
- Empresanan: Pa sponsorship, teambuilding òf sosten logístiko.
- Organisashonnan di naturalesa: Pa ekspertisio i outreach.
- Fotógrafonan i amante di naturalesa: Pa dokumentá i identifiká sortonan.
- Instruktornan di buseo: Pa organisá buseo temátiko i eksplorá e mundu di bou di awa di Kòrsou.
- Guianan di naturalesa: Pa paseonan ku guia den mondi.
Tuma kontakto via [email protected] si bo ke kontribuí!
Huntu Pa Biodiversidat
City Nature Challenge ta un chèns pa dokumentá i selebrá e biodiversidat di Kòrsou. Esaki ta un evento ku ta reuní sientífiko, amante di naturalesa, i komunidat lokal pa hasi un diferensia. Den e aña di aniversario di City Nature Challenge, laga nos mustrá kon Kòrsou ta kontribuí na un moveshon global pa preservashon di naturalesa.
Ke sa mas òf registrá?
Manda un e-mail na [email protected].
Sigui nos pa mas update: Na Instagram i Facebook @citynaturechallengecuracao.City Nature Challenge Kòrsou | 25–28 di April 2025
