Nos dushi Kòrsou ta un paraíso ku ta stimá tantu pa nos habitanten komo pa turista. Pero kada paraíso tin su kuidadó i un persona ta sobresalí pa su dedikashon sin limitashon pa preservá e bunitesa di nos isla: sr. Frans van der Post mihó konosí komo: Kunuku Man. Komo un persona ku ta stima naturalesa i medio ambiente, ela pone su mishon pa protegá e herensia natural di Kòrsou, organisando akshon di limpiesa di bándariba te bándabou.
Durante hopi aña Kunuku Man a inspirá miles di hende ku su akshonnan di nivel lokal. Huntu ku su grupo di boluntario fiel, e ta organisá limpiesanan den luganan públiko, riba playa i den áreanan ku ta bandoná. E ta kambia luganan yen di shushi den oasís bunita. Pero su trabou no ta solamente pa limpiesa; e ta krea un kultura di konsenshi i orguyo pa e bunitesa natural di Kòrsou. Ku su trabou, e ta uni hende i ta mustra ku kada hende por kontribuí pa tene nos isla limpi i bunita.
Pa nos na Maduro & Curiel’s Bank, Kunuku Man ta e persona ku meresé e MCB Prize e aña aki. E premio aki ta duna rekonosementu na un persona, evento, organisashon òf kompania ku na nos humilde opinión a sobresalí i/òf hasi un impakto mas positivo den nos komunidat durante e aña aki. E aña aki ta e di 28 aña konsekutivo ku nos ta entregá e MCB Prize. Pa e okashon aki Kunuku Man ta risibí e montante di NAf. 25.000,- for di MCB pa e trabou asina bunita ku ela bin ta hasi pa huntu ku su tim di boluntario, tene nos dushi Kòrsou limpi.
E loke ta distinguí Kunuku Man no ta solamente su esfuerso, pero tambe e manera inovativo ku e ta enboblbí nos komunidat. E ta traha huntu ku skolnan pa motivá muchanan pa partisipá den limpiesanan i ta enfoká riba maneranan di biba sostenibel. Hasiendo uso di medianan sosial, e ta konbertí e limpiesanan aki den un movementu popular, ku tur dia mas hende ta uni na su akshon.
E impakto di trabou di Kunuku Man ta visibel. Playanan ta mas limpi i barionan ta mas bunita. Pero e efekto di su trabou ta bai mas leu ku solamente e aparensia di e isla. Su esfuerso a subi e konsientisashon na tur edat i e ta motivá hende pa tuma akshon. Tratando shushi direktamente, Kunuku Man no solamente ta preservá bunitesa di Kòrsou, pero tambe ta kontribuí na un futuro sostenibel.
Ta evidente ku e dedikashon di Kunuku Man meresé rekonosimentu. Su esfuerso a toka hende hopi i ta reforsá e importansia di kuida nos dushi Kòrsou. Honrand’e pa su kontribushon positivo no solamente lo rekonosé su trabou, pero tambe inspirá otro hende pa sigui su ehèmpel. Kunuku Man ta mas ku un defensor di naturalesa; e ta un símbolu di speransa, akshon i unidat pa Kòrsou—i pa nos na Maduro & Curiel’s Bank, e ta un berdadero héroe lokal.
Nos ta felisitá Kunuku Man i su grupo pa e trabou inkreíbel ku nan ta hasi pa tene Kòrsou limpi i bunita, sigurando ku nos isla ta keda un paraíso pa generashonnan ku ta bini.
Masha masha pabien i masha masha danki pa tur loke bo ta hasi i pa motivá henter nos komunidat pa traha huntu i tene nos dushi Kòrsou limpi!
