WoMen Steering Committee Curaçao (WSCC), durante di e aña koriente a prepará i ehekutá diferente proyekto den kuadro di selebrashon di su di 50 aniversario. Pa klousurá su aña di hubileo di oro, WSCC a realisá 3 proyekto sosial, ku sosten di vários instansia i persona ku a aportá na e proyektonan komo akshon di duna bèk na komunidat.
Ku e promé un proyekto a logra opsekiá un bistí na 50 mucha di entre 4 pa 14 aña. Diferente donante a yuda WSCC bisti e muchanan en kuestion.
Ku e di dos proyekto a hasi entregá di 50 makutu ku komestibel na 50 famia ku a skohe ku yudansa di Unidat di Bario i algun organisashon mas.
E di tres proyekto a enserá ku a regalá 50 kliente di Wit Gele Kruis, un pakete ku ta kontené sèrbètènan i un produkto pa kuido di kurpa.
“Nos ta hopi kontentu di por a realisá e tres proyektonan aki,” sra. Mirieta Lourens-de Lanoy, presidente di WSCC a bisa. Esakinan nos por a hasi posibel danki na koperashon/donashon di e diferente grupo afiliá na WSCC, nos konseheronan, miembronan di e komishon selebrashon 50 aña WSCC i muy en espesial spònsernan.”
“Nos ke yama tur hende danki di kurason pa nan aporte pa chikí esaki por mustra. Ta uniendo bon intenshon, kapasidat i forsa, nos por traha huntu na mihó Kòrsou.”
“Keda pendiente pa un di 4 proyekto ku nos no a logra den 2024 pa kua WSCC a uni forsa ‘Child First Foundation’ pa tene e ‘Kaminata Yu i Tata’ ku lo tuma lugá djis despues di temporada di Karnaval 2025,” sra. Lourens – de Lanoy a klousurá bisando.
