Riba djaweps 23 di yanüari, durante oranan di anochi, 2BAYS a tene un enkuentro informativo den kolaborashon ku representantenan di Royal HaskoningDHV i Ministerio di Salubridat, Públiko, Medio Ambiente i Naturalesa (GMN). Atraves di un presentashon ekstenso, e CEO di 2BAYS sr. Patrick Newton i tambe e Senior Consultant di Royal HaskoningDHV, sr. Rick Huizinga, a informá un grupo di mas o ménos 50 persona presente tokante e plannan di 2BAYS pa futuro, i e petishonnan ku 2BAYS a hasi pa risibí e pèrmitnan pa operá e fasilidatnan na Emmastad i na Bullenbaai. 2BAYS a splika ku ke kontinuá ku e aktividatnan aktual i start ku e promé fase, un parti relativamente chikí, di e refineria pa produkshon di asfalt. Tambe a hasi petishon pa e aktividatnan di almasenahe na Bullenbaai i ‘blending’ na Emmastad. Ku e aktividatnan 2BAYS ta kontribuí ku e desaroyonan di Kòrsou. GMN tambe a duna un presentashon pa informá tokante e kondishonnan aplikabel i e prosedura responsabel pa otorgá e pèrmitnan konserní.
Den e último kuartal di 2024, 2BAYS a entregá e petishonnan pa pèrmit pa operá e fasilidatnan na Emmastad i na Bullenbaai. E pèrmitnan ta un parti esensial di 2BAYS su plannan pa futuro. A investigá e efektonan riba medio ambiente di forma ekstenso. Dor di e ambishon di 2BAYS, pero tambe e lei nobo di medio ambiente i e kantidat limitá di e aktividatnan, e efekto riba medio ambiente den e área ta chikí. E petishonnan aki ta kana pareu ku medidanan ambiental ku ta basá riba un maneho ku ta na e mesun nivel ku e leinan ambiental oropeo i hulandes.
Ta spera ku lo publiká e konsepto di e pèrmitnan i pone esaki disponibel pa konsulta den e periodo di mart/ aprèl. E momentu ei lo tin oportunidat pa entregá komentario òf opservashonnan.
Di e forma akí 2BAYS ta dal un stap importante den direkshon di e plannan nobo pa krea aktividatnan ekonómiko i un futuro sostenibel pa Kòrsou. 2BAYS ta keda habrí pa pregunta i remarke, i ta wak bèk riba un enkuentro positivo, ku konfiansa den progreso di e trayekto.
