Ministerio di Enseñansa, Siensia, Kultura i Deporte ta informá ku Sektor di Kultura i Deporte no a risibí reakshon di organisashonnan riba e destaho públiko ku a tuma lugá na òktober 2024 pa loke ta trata organisashon di aktividatnan di seú 2025 – 2028. Konsekuentemente ningun organisashon a keda apuntá pa risibí supsidio pa organisá aktividatnan ku ta keda supsidiá pa gobièrnu pa e temporada di seú 2025-2028.
Pa garantisá ku tur e aktividatnan mará na temporada di Seú 2025 por kontinuá, Minister di Enseñansa, Siensia, Kultura i Deporte, Sr. Sithree van Heydoorn, a lanta un ‘Task Force’ spesial ku ta enkargá ku organisá tur e aktividatnan ku ta risibí supsidio di Gobièrnu di Kòrsou rondó di nos fiesta kultural Seú Kòrsou 2025.
E ‘Task Force’ lo tuma kontakto ku tur grupo i instansia nan relashoná ku selebrashon di Seú 2025, pa sigurá ku e temporada ta keda realisá den un manera ku ta inkluí tur persona i instansia konserní, pa nos por sigui mantené e kultura di Seú bibu.
Gobièrnu di Kòrsou ta rekonosé i balorá e importansia di nos fiesta kultural i ta komprometé pa sigui duna apoyo na nos kontinuidat den e temporada akí tambe.
Gobièrnu di Kòrsou ta konta ku sosten di Pueblo, di manera ku nos por tin un temporada di Seú eksitoso. Huntu nos lo biba nos Seú i engrandes’é!
