Corendon Kòrsou ta traha huntu ku University of Curaçao Dr. Moisés da Costa Gómez (UoC) i 2030HUB Caribbean Foundation den forma di un koperashon privá-públiko (publiek-private samenwerking, PPP) dirigí riba sostenibilidat. E proyekto ta apliká e ophetivonan di Desaroyo Sostenibel (SDG) den Karibe Ulandes. E programa a keda desaroyá pa e fakultat Engineering & Sustainable Technology i Finance & Control di UoC. Den kuadro di esaki e programa SustainaBUL a keda desaroyá. SustainaBUL ta un modulo inisiá pa 2030Hub den kua e studiantenan ta konektá ku empresanan pa di e forma ei pone e teoria di sostenibilidat den práktika.
E aña aki, SustainaBUL a wòrdu implementá pa promé biaha den e kurso di International Hospitality & Tourism Management. Den esaki Corendon tabata tin e primisia.
15 studiante a investigá e impakto di ‘single-use’ plestik den Corendon Mangrove Resort i Corendon The Rif Resort. E studiantenan a identifiká puntonan pa mehorá i a duna rekomendashon konkreto kon pa redusí sushi debí na uso di plèstik. Corendon a haña dia 22 di yanüari un presentashon chikí di nan investigashon. E resultádonan final ta bai ser presentá durante e Student Sustainability Awards dia 11 di febrüari na UoC. Invitádonan i otro partnernan den e proyekto tambe ta bai ta presente.
Corendon tin hopi aña kaba ta dediká su mes na redukshon di sushi. Por ehèmpel ta tene mangrove limpi i ta organisá akshonnan di limpiesa. Corendon ta kontinuá i kontribuí na solushon sostenibel ku ta benefisiá medio-ambiente i ta mehorá e eksperensia di huespet.
Corendon Curaçao ta gradisí UoC, su doséntenan i e organisadónan di programa, i ta spera ku mas kompania lo uni den e kousa aki.
Pa mas informashon tokante e proyekto:
SusinaBUL – Iwan Zunder, [email protected]
UoC-docent – Els Steenhagen, [email protected]
