7 di febrüari 2025 ta marka un momento históriko pa Kòrsou. Minister di Tráfiko, Transport i Planifikashon Urbano, señor Charles Cooper, a firma un akuerdo importante ku Curaçao Airport Holding (CAH) pa sigui desaroyá henter e área rònt di aeropuerto di Kòrsou. E desaroyo akí lo tin un impakto grandi riba e ekonomia di Kòrsou.
Minister Charles Cooper huntu ku Señor Wilhelmus Ignacio, direktor di Curaçao Airport Holding a firma e akuerdo. Minister Cooper a enfatisá importansia di e paso históriko aki: “E akuerdo aki ta un punto di esensial den desaroyo espasial i ekonómiko di nos isla. Ku e rezonifikashon aki, nos ta krea oportunidat nobo pa invershon, inovashon i kreashon di trabou. E proyekto aki lo duna un push grandi na nos ekonomia i kontribuí na un Kòrsou mas pròspero.”
Den e vishon, lo tin hopi atenshon pa e áreanan bèrdè i kultural históriko (Gròtnan di Hato, Roi Rincon) ku lo bira parti integral di e desaroyo.
E kolaborashon entre e ministerio i CAH ta garantisá ku na un manera integral i ku vishon pa futuro di planifikashon di nos espasio, ku kresementu ekonómiko i sostenebilidat ta kana man den man. Pronto lo tuma pasonan pa desaroyá i implementá e akuerdo aki.
