Pirnan di haf di piskadó di Piskadera ta un di e pirnan di sumo importansha pa nos piskadónan i pa komunidat di Kòrsou en general pa loke ta trata disponibilidat di piská riba nos merkado lokal. Hopi aña a pasa sin ku a hasi trabounan di mantenshon na e pirnan di Piskadera i konsekuentemente nan tabata den un estado hopi deplorabel i tabata forma un peliger pa tur esnan ku ta hasi uzo di e pirnan.
Resientemente a kuminsá ku trabounan di renobashon kaminda primeramente a inspekshoná e struktura di e pirnan pa despues kambia tur e palunan kaminda piskadónan mester kana bai nan boto. Den futuro serkano ta bini tambe un dòk kaminda piskadónan por hasi trabounan di reparashon na nan boto i lo bini un ofisina di AVB (ántes LVV) na e haf pa duna mihó servisio na piskadónan i na komunidat.
Na e momentunan aki 2 di e 3 pirnan a keda renobá, pues falta 1 pir pa terminá e trabounan. Riba promé 3 potrètnan por mira momentu ku Minister di Asuntunan General enkargá tambe ku agrikultura, medio ambiente i naturalesa señor Gilmar Pisas, ta inspekshoná e estado deplorabel di e pirnan. Riba e 3 último potrètnan por mira kon bunita i safe e pirnan a keda despues di e trabounan di renobashon.
