Riba djamars 25 di febrüari 2025 2BAYS Curaçao i Curaçao Refinery Utilities (CRU) a hasi reapertura ofisial di Post 5, un di e entradanan ofisial ku ta duna akseso na tereno di Isla. Despues di mas o ménos 5 aña ku e entrada tabata inaktivo, a bolbe habri Post 5 pa akomodá e aktividatnan kresiente na e Área Industrial na Schottegat i pa halsa aksesibilidat pa personal i kontratistanan. Despues ku a firma e akuerdonan di hür ku tantu Global i Oryx pa un término largu, planifikashon i ekekushon di trabounan pa drecha diferente unidat, steiger, tanki i pipanan a start. Poko poko pero sigur, por mira ku tur e pasonan aki ta garantisá ku diferente planta ta start. Promé Minister di Kòrsou, sr. Gilmar Pik Pisas, a hasi e akto simbóliko di reapertura, i tabata e promé persona ku a subi tereno via e entrada ku a keda habrí, siguí pa diferente kontratista ku tabata kla pa kuminsá traha. E evento a marka un logro importante den e desaroyonan kontinuo di operashonnan na e Área Industrial na Schottegat.
Promé Minister a splika durante su diskurso ku e echo ku nos Refineria a stòp di operá mas ku 5 aña pasá, ta trese su retonan pa start bèk di un manera “safe” i sigur. No opstante esaki, tin trabounan grandi tumando lugá. “Nos tur por a tuma nota ku Global Oil, na nòmber di nos kontratistanan lokal, a saka un aviso den tur korant, kaminda ta buskando 320 trahadó di fishi pa traha riba e proyektonan grandi di revishon ku ta tumando lugá i òf lo start pronto. Mi ta hopi kontentu ku e trabounan grandi ku ta tumando lugá na Refineria i ku e invershonistanan di Global Oil i Oryx. Nan ta hinkando miyones den nos ekonomia i tambe ta kreando kuponan di trabou pa nos yunan di Kòrsou”, Minister Pisas a bisa.
Post 5 lo sirbi komo un ruta di akseso sentralisá adishonal, ku ta kordiná entrada i sigurá tráfiko efisiente di trahadónan i kontratistanan envolví den e diferente proyektonan. Su reapertura ta suprayá e kresementu den demanda pa mehorá e fasilidatnan pa sostené tantu aktividatnan aktual komo esnan di futuro riba e tereno. Por lo pronto, Post 5 lo ta habrí solamente durante oranan mas trafiká, kual ta entre 6:00 ‘or pa 8:00 ‘or, entre 11:45 ‘or pa 13:30 ‘or i entre 15:00 ‘or pa 17:30 ‘or durante di siman.
“Nos ta kontentu di por bolbe habri Post 5 i ku esaki por sirbi pa fasilitá tantu e 1200 personanan ku ta trahando aktualmente riba nos terenonan, komo esnan ku lo kuminsá pronto” direktor di 2BAYS Curaçao, Patrick Newton a bisa.
