Djárason 19 di febrüari 2025, durante e Film Happy Hour di e promé kuartal organisá pa Film Office Curaçao (CFO), ku a tuma lugá na Mondi Beach Club, a anunsiá ku Kòrsou ta forma parti di e akuerdo di ko-produkshon entre Hulanda i Canada.
Film Office Curaçao, ku yudansa di e direktor i produktor Kanades TJ Scott, despues di un investigashon largu, a risibí konfirmashon ku Kòrsou ta inkluí den e akuerdo di ko-produkshon entre Hulanda i Canada. Esaki ta un desaroyo masha importante pa e sektor di sine di Kòrsou.
Un akuerdo di ko-produkshon entre dos pais ta nifiká ku e dos paisnan por filma den teritorio di otro bou di kondishonnan favorabel. Ku Kòrsou ta forma parti di e akuerdo aki, ta habri e posibilidat pa produktornan yu di Kòrsou traha huntu ku produktornan Kanades i asina haña akseso na fondo gubernamental di Canada.
Kasnan di produkshon Kanades grandi, manera Telefilm Canada i Shaftesbury, a mustra interes pa traha na Kòrsou bou di e akuerdo di ko-produkshon aki.
Un di e kondishonnan prinsipal pa e akuerdo aki por drenta na vigor ta e plan di insentivo di sine di Film Office Curaçao keda kla den korto tempu.
