Gobiernu di Kòrsou pa medio di Ministerio di Enseñansa, Siensia, Kultura i Deporte, i den kolaborashon ku partnernan nashonal manera e Katedra di UNESCO pa SIDS (Small Island Development States) na Universidat di Kòrsou, a organisá un seshon di validashon pa analisá kon prepará Kòrsou ta pa ‘Artificial Intelligence’ (AI). Esaki a sosodé ku yudansa di e ‘Readiness Assessment Methodology’ (RAM) di UNESCO.
RAM ta un método ku ta duna un bon bista riba e kapasidat nashonal pa implementá rekomendashonnan di UNESCO riba étikanan di AI. E ta yuda identifiká oportunidatnan i retonan den desaroyo di AI, ku enfoke spesial riba derechonan humano, transpariensia i sostenibilidat.
Riba djárason, 26 di febrüari, Konseho di Minister a risibí un presentashon di resultadonan di e estudio. E investigashon akí ta mustra unda aktualmente Kòrsou ta ku AI i ta indiká pasonan ku mester tuma pa mas desaroyo, inkluso maneho i regulashon.
E ‘soft launch’ i entrega ofisial di e rapòrt na Minister di OWCS ta tuma lugá dia 7 di mart benidero. Esaki ta marka un paso importante den e aserkamentu stratégiko di AI na Kòrsou.
