E delegashon di Bonaire a tene reuniónnan bilateral ku lidernan di CARICOM durante e 48 Reunión Regular di CARICOM di Hefenan di Estado na Barbados pa diskutí e kaso urgente i ku a empeorá di Bonaire, unda e pueblo nativo ta siendo marginalisá riba su propio isla.
E delegashon ta ekstendé su felisitashonan sinsero na e Honorable Promé Minister di Barbados, Mia Amor Mottley, pa su apuntashon komo Presidente di e Komunidad Karibeña (CARICOM). Bonaire ta rekonosé su liderazgo firme den avansá integrashon regional i abordá desafionan krítiko ku ta enfrentá e region di Karibe.
E delegashon a hasi un apelashon direkto i urgente na lidernan di CARICOM pa para den solidaridat kontra e re-kolonisashon di Bonaire, un realidat alarmante den Karibe den Siglo 21.
Despues di disolushon di e Antia Hulandes na 2010, Bonaire a wòrdu ilegalmente integrá den e konstitutshon Hulandes bou di kondishon desigual, sin konsentimentu di su pueblo. Desde e momento ei, e poblashon nativo a disminuí drástikamente, di mas ku 80% promé ku 2010 te menos ku 32% awe. E bahada aki ta wòrdu impulsá prinsipalmente pa polítika di permití inmigrashon sin restrikshon di siudadanonan Hulandes Oropeo, ku ta haña derecho di vota den elekshonnan lokal i referenduman despues di 90 dia di nan yegada. Mas ahinda, Papiamentu, idioma nativo di e isla, a wòrdu remplasá pa Hulandes komo e idioma prinsipal di instrukshon den skol, amenasando sobreviviensia di kultura, identidat i eksistensia di Bonerianonan.
Pa reakshoná na e krisis aki, Bonaire ta hasi yamada na CARICOM pa tuma akshon kolektivo, similar ku e resolushon ku a wòrdu adoptá na e di 97 Seshon Ordinario di e Parlamento di MERCOSUR den desèmber 2024, ku a deklará sosten pa re-list di Bonaire komo un Teritorio Sin Propio Gobernashon bao di skrutinashon di e Komité Espesial di Deskolonisashon, C24 di Nashonan Uni. MERCOSUR ta konsisti di e paisnan: Argentina, Brasil, Bolivia, Paraguay, Uruguay, Chile, Colombia, Ecuador, Guyana, Panama, Peru, i Surinam.
“Mientras CARICOM ta kontinuá adoptá solidaridat regional, risibiendo Kòrsou komo miembro asosiá den 2024 i ta konsiderando St. Maarten Hulandes pa e mesun status e aña aki, nos ta urgí CARICOM pa tuma un posishon pa Bonaire i sostené su lugá hustu legítimo riba lista di Territorionan-Sin-Propio-Gobernashon” e delegashon di Bonaire a enfatisá.
Boneiru ta mirando ansiosomente direkshon di e liderazgo di honorabel Promé Minister Mia Mottley i CARICOM pa sigurá ku e pueblo di e isla resibi protekshon internashonal ku nan meresé.
