Dia 13 di mart Curaçao International Film Festival (CIFF) ta organisá un anochi di pelíkula di ‘preview’ spesial den The Movies Otrobanda. E anochi aki ta marka e inisio di e di 11 edishon di e festival i tambe ta enfatisá e laso spesial ku e prestigioso Morelia International Film Festival na Mexico. Riba e programa tin dos pelíkula: e anochi lo habri ku e pelíkula kòrtiku Buscando un Burro i lo wòrdu sigui pa Sujo, e entrada ofisial di Oscar mehikano di e aña aki i e gran ganadó di vários premio Ojo na e International Film Festival na Mexico 2024.
Sujo, dirigí pa Astrid Rondero i Fernanda Valadez, a hasi un impreshon grandi den Morelia i a gana e premionan Ojo pa Mihó Pelíkula, Mihó Direktor i Mihó Guion. E hurado a elogiá e pelíkula komo “metikulosamente konstruí i skurmente poétiko”, ku un final inusualmente optimista i humano pa e personahe prinsipal.”
E pelíkula sekundario Buscando un Burro, di Juan Vicente Manrique, ta un tragicomedia Venezolano den kual dos bombero ta yama bon bini na un buriku komo presidente. Un chiste inosente ku ta kaba den un detenshon inesperá.
Ku e karakterístika dòbel aki, CIFF ta ofresé amantenan di pelíkula un pregusto di e programa diverso i di kalidat haltu ku lo wòrdu mustra durante e festival mas lat e aña aki i relashon spesial ku Morelia International Film Festival na Mexico.
E koperashon di hopi tempu entre CIFF i e Morelia International Film Festival ta koroná e aña aki ku e yegada di Daniela Michel, Direktor General di Morelia, na e próksimo edishon di e festival. E lo fungi komo presidente di e hurado pa e Yellow Robin Award durante e di 11 edishon di CIFF. E hurado lo inkluí Ailsa Anastasia i Sinuhe Oomen tambe. Michel su bishita ta subrayá e importansia di interkambio kultural i e laso estrecho entre ambos festival.
Karchinan pa e preview dia 13 di mart ta optenibel na The Movies Otrobanda òf via e wèpsait www.themoviescuracao.com.
