Den e di 15 episodio di e WeConnect Podcast, e tema braingain ta central. Esaki ta e emigrashon di hobennan intelectual of bon studia ku ta emigra na un país industrialisá, lo kual por forma un fuente potensial pa desaroyo socio-ekonómiko pa nan pais di orígen na momentu ku nan regresa bek. I e braindrain, ta tuma luga na momentu ku e hobennan ku a bai studia afo hasi e eskoho pa no regresa bek na nan pais di orígen. Podcast host Supharmy Lard ta toka e tema den kombersashon ku David van Delden, Co-founder I Creative Director di Ngrane, un agensia di diseño i innovashon, i ku empresaria Stephany Willems.
Red
David i Stephany ambos ta di Kòrsou. Stephany a biba i traha na Kòrsou pa mas o menos diessinku aña despues di su estudio di International Communication & Media na Utrecht. No tabata fasil pa Stephany haña un puesto apropia na Kòrsou: “Na Hulanda bo tin hopi opshon, pero Kòrsou ta chikí i bo mester di un red di kontakto, especialmente den mi area profesional.” Stephany a tuma diferente tipo di trabou, pero esey tabata sinti komo un “struggle” pa e a logra sobrebibi finansieramente i na mes un momentu haña algu na su nivel di estudio.
Sektor Kreativo
David a bai Hulanda pa su estudio i a desaroya como UX designer i productor kreativo.Bolbe bek Kòrsou despues di su estudio no tabata un opshon, debi na falta di oportunidatnan den e sektor kreativo. David huntu ku su sosio na Hulanda a fundá nan agensia di diseño Ngrane na Ámsterdam, na kual David ta e Creative Director pa mas ku15 aña.
Konosimentu
Kòrsou ta den desaroyo i esaki ta ofresé mas oportunidatnan pa trabou na distansia, segun David. Pa medio di su agensia Ngrane, e ta traha ku varios organisashon i klientenan riba e isla. “Esaki tambe ta un forma di braingain, pa por hasi un kontribushon na bo isla dor di komparti bo konosementu.” David ta orguyoso di su identidad komo Kurasoleño , su idioma i kultura, i e identidad Kurasoleño tambe ta wordu inkorpora den su trabou na Ngrane.
Mindset
Ambos ta eksperimentá ku e “mindset” na Kòrsou ta kambiando den un manera positvo, aunke e evulushon ta bai lentamente (“tiki tiki”). E sintimentu di ser bon bini i ta di un balor adishonal pa bo isla ta krese, ora mas young professionals remigrá. Stephany tin un konseho pa esnan ku ta pensa di bai bek: “Bo por kuminsa traha riba base di proyekto ku organisashonnan na e isla desde Hulanda. E pórta ta keda un tiki habri pa si bo realmente disidi di bai bek.”
E WeConnect Podcast aki ta den Papiamentu i ta wordu preséntá dor di Supharmy Lard i por wak aki:
