Minister Shalten Hato di ministerio di Maneho di Gobernashon Planifikashon i Servisio Públiko (BPD) awe a entregá dekreto( Landsbesluit) na investigadónan estadístiko ( (statistische onderzoeker) di Ofisina Sentral di Statistik (CBS) ku resientemente a keda tumá den servisio . Entre nan, tin 3 “young professionals ” yu di Kòrsou for di Hulanda.
Na momentu ku Minister Hato a tuma nota di e nesesidat grandi pa mas personal den CBS, el a kuminsá studia e posibilidatnan pa den término kòrtiku tuma mas personal pa e departamento aki pa asina nan por ehekutá nan trabounan mas efisiente posibel. Mirando tur esakinan minister Hato a bai di akuerdo pa habri vários funshon mas.
Banda di esaki Minister Hato a aprobá tambe vários funshon pa CBS por tuma mas persona ku a solisitá durante e proyekto di ‘jobfair’. Ku e stap grandi aki CBS a keda hopi kontentu i satisfecho ku Minister Hato , mirando ku pa hopi aña no tabatin atenshon pa e organisashon ni pa maneho di personal. Esaki ta importante pa CBS por ehekutá su trabounan manera mester ta. Durante e entrega di e dekretonan, minister Hato a yama e personal ku a drenta nobo den servisio “Bon Biní” i a duna nan palabranan di motivashon i deseá nan éksito den nan funshon nobo.
Ku esaki Minister Hato ta logra subi e nivel di kalidat di e organisashon pa asina nan por sigui brinda un bon servisio na komunidat.
