Introdukshon di Instituto Nashonal di Kultura Kòrsou a tuma lugá na Gomezplein 7. E momentu spesial akí ta marka e promé paso mas serka di realisashon di nos Instituto Nashonal di Kultura Kòrsou, ku lo enfoká riba preservá, promové i fortalesé kultura di Kòrsou. Na e okashon akí Minister di Enseñansa Siensia, Kultura i Deporte a inougurá e eksposishon na e promé di e tres pisonan ku e Instituto Nashonal di Kultura Kòrsou lo konsistí di dje.
E anochi a keda dirigí pa sr. Glenn Thomas ku tabata e maestro di seremonia na e okashon akí i a inisiá ku interpretashon di Himno di Kòrsou kantá pa Bold Star Foundation. Presentenan por a mira un video di nos artista visual Giovanni Abath ku a splika detayadamente kiko ta e balor agregá di un Instituto Nashonal di Kultura Kòrsou pa e artista di Kòrsou. Señora Lizette Sambo-Velder a splika tur e trabounan ku Sektor di Kultura i Deporte a bin ta hasi pa por logra inisiá e proseso pa yega na nos Instituto i señora Aisha Gijsbertha-Leer a splika e metanan ku nos Instituto Nashonal di Kultura ta bai enfoká riba i dediká na dje, pa desaroyo di un struktura kultural dinámiko i resistente. E instituto lo tei pa protehá, fortalesé i stimulá nos herensia kultural aktivamente, di tal forma ku kultura ta bira un parti integral i aksesibel den bida diario pa tur habitante di Kòrsou.
Minister di Enseñansa, Siensia, Kultura i Deporte sr. Sithree van Heydoorn a duna un diskurso ku a sirbi di inspirashon pa esnan presente. Den e diskurso el a splika ku nos Instituto Nashonal di Kultura Kòrsou tei pa keda i ku e ta aspirá pa e ta un sektor kultural bibu, inklusivo i sostenibel ku ta sostené i fortalesé e identidat i kreatividat di pueblo di Kòrsou. Mediante inovashon, edukashon i kolaborashon, e instituto lo kontribuí na trese nos pueblo huntu, yuda ku kresementu ekonómiko i oumentá e konsiensia kultural, tantu lokal komo internashonal. Den poko palabrá e instituto lo ta un pilá importante den edifikashon di nos nashon. E promé paso ta pa kuminsá ku tayernan i kursonan pa alsa e kapasidat di ehekushon di nos organisashonnan kultural. E instituto tei pa kordiná trabounan i pone e sektor kultural den su forsa pa mantené nos kultura bibu! Minister Sithree van Heydoorn, a enfatisá ku desaroyo di e instituto lo tuma lugá paso pa paso i ta invitá presentenan pa duna nan kontribushon pa asina huntu nos pone kultura bèk na e lugá ku e meresé.
E anochi a keda animá ku músika di Baba Awokosé, deklamashon di Jesmelys Zink Angelista, ekspreshon di baile pa Melanta Ayon i interpretashon di kansionnan pa Danté Marcano i Lugeaden Jansen. Un parti importante di e evento tabata e apertura ku Minister Sithree van Heydoorn a hasi di e ekshibishon “Kargadó di Kultura”, kaminda figuranan kultural prominente manera Elia Isenia, Gilbert “Gibi” Bacilio, Jeanne Henriquez, Venancio “Pacheco” Domacassé (+), Rose Mary Allen, Roland “Roy” Colastica, René Rosalia, Su Girigorie (+) i Yubi Kirindongo, ta keda honrá pa nan dedikashon na konservá i engrandes’é kultura di Kòrsou.
Kiko ta un Kargadó di Kultura?
Un Kargadó di Kultura ta un persona ku a dediká su mes na un manera eksepshonal na preservashon, praktiká i promoshon di e identidat kultural di Kòrsou. Nan trabou ta forma e base riba kua e herensia kultural aktual a keda konstruí i ta sirbi komo inspirashon pa futuro generashonnan. E ekshibishon ta rekordá nos ku kultura ta un konstrukshon kolektivo, un proseso dinámiko ku ta rekerí partisipashon kontinuo di e komunidat. Di piskadónan te dosentenan, di hóbennan te personanan di edat; tur hende ta kontribuí na preservashon i evolushon di nos kultura. E eksposishon ta interaktivo kaminda bishitantenan por skèn diferente “QR-Code” i partisipá den e proseso di krea huntu nos Instituto Nashonal di Kultura di Kòrsou. Pueblo por interpretá i duna un deskripshon di e logo apstrakto ku ta pará komo símbulo di e Instituto. Den e eksposishon tin tambe posibilidat pa bishitantenan por duna ideanan pa engrandesé nos Instituto Nashonal di Kultura Kòrsou.
Orario di Apertura di Ekshibishon “Kargadó di Kultura”
E eksposishon ta aksesibel pa públiko riba e siguiente dianan i orarionan:
- Djabièrnè 14, Djasabra 15, Djaluna 17 te ku Djabièrnè 21 di mart
- 10:00 – 12:00 & 13:00 – 15:00
- Djamars 20 di mart
- 10:00 – 12:00 & 13:00 – 20:00 (Durante Punda Vibes)
Desaroyonan den Futuro :
Ku e Evento di Introdukshon Instituto di Kòrsou, un promé paso importante ku Sektor di Kultura i Deporte a tuma ie trabou ta sigui. E siguiente fase den lantamentu di Instituto Nashonal di Kultura Kòrsou ta lantamentu formal di e fundashon i apertura di vakaturanan. Ta trahando riba un instituto fuerte i sostenibel ku lo sostené i fortalesé kultura di Kòrsou pa futuro generashonnan.
Ku e pasonan akí, Sektor di Kultura i Deporte ta trahando riba un base sólido pa un instituto ku lo hunga un ròl importante den e futuro kultural di Kòrsou. E komunidat ta keda invitá pa partisipá na e desaroyo akí i bishitá e ekshibishon “Kargadó di Kultura” pa duna un homenahe na esnan ku ta mantené nos kultura bibu i aportá na e nos Instituto Nashonal di Kultura. Minister di ESKD i Sektor di Kultura i Deporte ta gradisí tur persona ku a yuda sembra un simia pa krea un vishon nobo pa nos Instituto i ta invitá pueblo pa ban nos tur huntu pa sigui duna kontenido na nos Instituto Nashonal di Kultura Kòrsou.
