Minister Presidènt enkargá ku Agrikultura, Medio Ambiente i Naturalesa señor Gilmar Pisas resientemente a bishitá playa Piskadó na Wèstpunt i playa Kalki kaminda e minister por a tuma nota di mas fasilidat ku a keda drechá òf konstruí pa piskadónan i bishitantenan di e playanan. Minister Pisas ta informá tambe ku pronto ta kuminsá ku drecha playanan na Banda Bou ku a sufri daño di e awaseru torensial ku a kai luna pasá. Mester a enkaminá un proseso di pidi kontratistanan oferta pa hasi e trabou kual ta un proseso ku ta tuma su tempu.
Na playa Piskadó Minister Pisas a tuma nota di trabounan ku a wòrdu hasí na e lokalidat kaminda piskadónan ta atendé ku piská. Den e kaso aki a drecha e dak i a fèrf henter e lokalidat hasié nèchi. Banda di esei a drecha tambe e baño públiko ku tin na e playa. Awor tur e fasilidatnan ta funshoná di manera ku piskadónan i bishitantenan di e playa por hasi uzo di baño ku ta den bon estado. Tambe a sigui traha riba e problemátika di espasio pa stashoná outo. Ariba, enfrente di misa, a basha un edifisio bieu abou pa asina krea mas espasio pa stashoná outo.
Minister Pisas a bishitá playa Kalki tambe kaminda kolaboradónan di su ministerio e momentu ei tabata instalá drijflijn na e playa. Playa Kalki último tempu ta un playa hopi bishitá i popular serka turistanan i pa e motibu aki a mira e nesesidat pa instalá drijflijn pa seguridat di usuarionan di e playa.




