Kòrsou un bia mas lo marka historia na Miss Grand International ku representashon di Akisha Albert, Miss Grand Curaçao 2024. E sertámen prestigioso di kual for di aña 2013 ta enfoká riba glamur i beyesa komo símbulo pa promové pas mundial, lo tuma lugá 25 di òktober próksimo na Tailandia i Cambodia.
E di 12 edishon di Miss Grand International ta konta ku mas ku 55 pais ku lo kompetí durante aproksimadamente un luna, ku e meta pa konkistá e título máksimo, kual ta Miss Grand International 2024. Un título ku ta basá riba 4 B krusial ku ta: Beauty, Body, Brains & Business.
Durante e sertámen di Miss Grandi International 2024, representantenan di kada pais lo forma parti di diferente kompetensianan adishonal manera e.o. kompetensia di trahe di baño, trahe nashonal i e kompetensia preliminar, di kual ta sumamente krusial pa por garantisá klasifikashon durante e anochi final.
Netamente esaki ta motibunan di kual nos representante, Akisha Albert, despues di a anunsiá su kompromiso ku pueblo públikamente, a inisiá su preparashon ku un tim konsistiendo di profeshonalnan tantu lokal komo internashonal. Akisha aktualmente ta na Puerto Rico, bou di guia di su profesor di pasarela Benjamin Diaz i ya a hasi algun seshon fotográfiko ku e konosido makiyadó Angel Rodriguez. Despues di Puerto Rico Akisha lo kontinuá su preparashon na Miami, den kual e lo forma parti di un ‘media tour’, seshon fotográfiko i tambe reunionnan ku algun diseñadó internashonal.
Konvensí di e tremendo trabou ku Akisha Albert lo desplegá na Tailandia i Cambodia, nos ta invitá pueblo di Kòrsou pa ban apoyá nos representante masalmente riba ret sosial. Kada mensahe positivo lo ta signifikativo pa logra e meta ku Kòrsou meresé. Por sigui e desaroyo di Akisha riba Instagram: Akisha Albert, Miss Grand Curaçao i naturalmente Miss Grand International.
Ya nos ta orguyoso i ansioso pa presensiá Akisha Albert bria ku su e elegansia, karisma i esensia. Éksito!
