Djamars, 21 di yanüari 2025 Fundashon Alton Paas a selebrá un logro pionero ku lansamentu di e kampaña “Akseso pa tur: Mobilidat i Inklushon na Kòrsou,” un inisiativa transformativo dirigí na empoderá personanan ku mobilidat limitá i promové un sosiedat mas inklusivo. Sostené pa Representashon di Hulanda, e evento a reuní stakeholdernan klave, partnernan i miembronan di komunidat pa mustra inovashon i kolaborashon den akshon.
Fundashon Alton Paas ta un organisashon sosial na Kòrsou ku ta komprometé su mes na inklushon i mehorashon di kalidat di bida di personanan ku dwarslaesie i otro desabilidat neurológiko. E fundashon ta ofresé e grupo aki akseso na entre otro servisionan di mobilidat i kampañanan di konsientisashon ku kua nan por partisipá aktivamente den sosiedat. E mishon aki ta estrechamente mará na fortalesé e resiliensia, seguridat sosial i outosufisiensia di siudadanonan vulnerabel.
Den e kuadro aki, Fundashon Alton Paas a lansa djamars 21 di yanüari 2025 e proyekto “Akseso pa tur: Mobilidat i Inklushon na Kòrsou”. Parti sentral di e lansamentu ta e desvelo di e promé vehíkulo elektriko aksesibel na Kòrsou, un símbolo di progreso sostenibel i inklusivo. E logro aki a bira posibel danki na kontribushonnan generoso di varios donante, manera Rotary Club Willemstad, kende ku su kampaña di Rota-(Fun)drive a perkurá pa fondonan signifikativo pa kubri e gastunan di e vehikulo.
Otro punto kulminante ta e introdukshon di e ‘rebranding’ di Wheelee, ku awor ta konta ku un logo moderno, kolonan vibrante y unifòrmnan nobo. E identidat renobá aki ta reflehá e kompromiso di Wheelee pa libertat i inklushon, resaltando su ròl komo un servisio esensial ku ta konektá personanan na oportunidatnan pa partisipá aktivamente den komunidat.
E evento ta marka tambe e introdukshon di e Kampaña di Konsientisashon di Mobilidat. Pa medio di historia di personanan ku un desabilidat, e kampaña ta mustra e bida sin limité, destakando kon transporte aksesibel ta permití hende ku desabilidat pa bibá bida independiente i konektá ku komunidat. E meta prinsipal di e kampaña ta pa inspirá kambio sosial i demostrá e importansia di krea un sosiedat inklusivo pa tur hende.
Ademas, durante e evento a anunsiá e kolaborashon ku dies negoshi lokal ku ta sostene e servisio di transporte di kual kuater di nan ta kuminsa ofresé deskuentonan eksklusivo na personanan ku desabilidat ku ta usa Wheelee pa bishitá nan lokalidatnan. E kolaborashonnan aki ta destaká e esfuerso kolektivo nesesario pa kibra bareranan i promové inklushon na Kòrsou.
Alton Paas, fundadó di Fundashon Alton Paas, a remarká: “E kampaña aki no ta trata solamente di inovashon, pero tambe di empoderashon i komunidat. Ku e imagen nobo di Wheelee i e sosten di nos partnernan, nos ta sòru pa un futuro ku mobilidat no ta un privilegio, pero un derechi igual pa tur hende na Kòrsou.”
E lansamentu di “Akseso pa tur” ta den liña ku e vishon di Wheelee 2.0 pa baha e barera di transporte aksesibel na kòrsou.
