Minister di Enseñansa, Siensia, Kultura i Deporte (ESKD) sr. Sithree van Heydoorn a keda invitá na Maria Immaculata Lyceum (MIL) djárason último na momentu ku alumnonan ku ta den e último fase di vwo i havo, mester a presentá nan investigashon den kuadro di nan materia di estudio (profielwerkstuk). Durante di e atardi Minister di ESKD a hiba palabra na alumno i mayornan tur ku tabata tei i deseá e alumno nan éksito ku nan presentashon i preparashon pa período di èksamen. Despues minister a partisipá komo invitado spesial na e lokal di Informátika serka guia/kordinadó pa e materia di Informátika sr. S. Losiabaar.
E promé grupo a tene un presentashon yamá: “Te laat doet geen baat”. E alumnonan a traha un aplikashon digital (CHRONO-SCAN AI), kaminda nan ta analisá e situashon na skol ku ta bira drùk na momentu ku hopi alumno yega lat. Nan a investigá esaki i a base di nan resultado nan a traha un aplikashon digital kaminda e registrashon di yegamentu lat ta bai di forma digital i mas efisiente. E dos alumnonan Jesus Davis Sanabria Subero i Angelina Emerenciana di klas vwo-6 a traha esaki usando aplikashonnan di inteligensia artifisial i métodonan digital pa traha na aplikashon.
E di dos grupo a tene un presentashon yamá: “DEERSPOTTER3000”. E alumnonan a hasi un investigashon huntu ku mas organisashon kaminda a hasi un investigashon di kon ta rekonosé i registrá potrèt di binánan den parke Kristòf. E alumnonan a hasi un análisis di e kámaranan ku Carmabi ta pone den e parke pa saka potrèt di e binánan. Pero e kámaranan ta saka tur loke ku ta move, esei ta nifiká ku nan ta saka para i tur otro bestia tambe. E alumnonan a hasi uzo di inteligensia artifisial i usa programanan digital manera GUI i YOLOv8-model. Nan a traha un aplikashon digital kaminda ta pone tur e potrètnan ku ser saká i e aplikashon ta rekonosé i registrá tur e potrètnan ku e binánan i tambe nan a traha na website. E grupo aki ta konsistí di 4 alumno di vwo-6 , ku ta Khion Dandaré, Jayden Esser, Antisar Idriss i Angel Kalmez.
Por mira bèk riba un bishita sumamente fasinante komo ku e aktividat aki ta kuadra ku e último bishita di Minister na Malta kaminda a enfoká riba e área di siensia. Na otro paisnan ya kaba fo’i chikí ta stimulá desaroyo sientífiko serka nos mucha ku ta kana ku e método nan di enseñansa den siglo 21. E tipo di aktividatnan aki ta duna alumnonan mas smak pa bai skol i sigui traha riba na desaroyo den e era moderno.
