Queen Making Queens Organization ta sumamente orguyoso di tin e frankisia di Teen Universe pa di dos aña konsekutivo. Un sertámen ku ta gosa di un popularidat i prestigio grandi internashonal. E aña aki, Teen Universe ta selebrá su di 14 edishon i tin mas ku 58 partisipante di diferente parti di mundo, ku ta kompetí pa e prestigioso koronanan, den tres kategoria. E sertámen lo tuma luga di 7 pa 14 di april próksimo, na Republika Dominikana.
Ayanette Haard Statia, komo doño i direktor internashonal, ta sigui kere den nos hóbennan i tin tur konfiansa ku Amanda Verkerk lo hasi un tremendo trabou pa representá Kòrsou. Amanda Verkerk a keda skohe komo Miss Teenage Globe Curaçao 2023 I na aña 2024 a representá Kòrsou ya kaba den un sertámen internashonal.
Tur e eksperensia aki sigur, lo yuda Amanda pa profilá den e sertámen di un taya hopi mas grandi. Faltando apenas 52 dia pa e sertámen kuminsa, preparashonnan ta birando mas intensivo pa nos Amanda Verkerk.
Lèsnan di public speaking, pasarela, orientashon i tur e preparashon di su selekshon di paña pa e sertámen ta bou di direkshon di Ayanette Statia huntu ku diseñador nan di Kòrsou, Venezuela i Republika Dominikana. Tambe Amanda tin diferente produkshon di video i potrèt pa asina mustra e bunita kultura i historia di Kòrsou. Na yegada na Republika Dominikana, Amanda lo wòrdú risibí pa un diseñador lokal i tambe un estilista lokal profesional, ku lo kompañé durante hinter e sertámen.
Ya publikashonnan ofisial a tuma luga i pueblo di Kòrsou por vota riba e potrèt di nos representante i tambe skibi e nòmber di Kòrsou pa mustra nos sosten na Amanda Verkerk i QMQ Organization.
E enthousiasmo ta haltu i hinter e famia di QMQ Organization tin konfiansa ku Amanda Verkerk ta bai hasi un ekselente trabou pa representa nos. E sertámen final lo tuma luga djasabra 12 di april 2025 i lo wòrdú transmití live via e página di youtube di Teen Universe.
Aki por mira un produkshon resien ku Amanda Verkerk a hasi ku un di su spònsòrnan prinsipal ku ta JSupriana Photography.
