Djabièrnè 16 di ougústús 2024 a tuma lugá apertura ofisial di un barbershop na Sentro di Detenshon i Korekshon Kòrsou.
Den presensia di klientenan ku a sigui e kurso di barbero, personal di SDKK i demas invitado a hiba palabra sra. Sharissa Llewellyn komo kordinadó di e kurso di barbero, Sra Julliene Daal komo inisiador di e barbershop, direktor Suplente sr. Anthony Hasselmeijer i minister di Hustisia sr. Shalten Hato.
E meta prinsipal di e barbershop aki lo ta pa e klientenan ku a sigui e kurso di barbero haña oportunidat pa por praktiká loke nan a siña riba un nivel profeshonal i tambe eksperensia e bida den un barbershop. Tambe lo bai tin espasio pa blòknan hasi uso di esaki.
E sermonia a terminá den un ambiente festivo, kaminda ku minister di Hustisia a kòrta sinta ofisial i alabes tabata e promé kliente den e barbershop na SDKK. Tambe na e okashon aki minister di Hustisia sr. Shalten Hato a hasi entrega di 5 mashin di pela pa por wòrdu usa den barbershop di prizòn.
Gerensia di SDKK ta sumamente kontentu ku e desaroyo aki i lo keda traha na bienestar i resosialisashon di nos klientenan.




