E apertura festivo di Courtyard by Marriott Curaçao a wòrdu selebrá djárason último ku 300 invitado. A papia riba esfuersonan i e proseso ku finalmente a kondusí na apertura di Courtyard by Marriott na Kòrsou. E koperashon di gobièrnu, finansiadornan lokal ku a finansiá henter e proyekto, i esfuerso di empresario- i empleadonan lokal ku a hasi e soño di empresario Gilbert bira realidat.
Entre invitadonan tabatin diferente minister, relashonnan i tim di maneho di partidonan envolví den konstrukshon i desaroyo di e hotèl. E operador i diseñadó di interior di e hotèl a biaha bin for di Miami spesialmente pa asistí n’e evento.
Invitadonan a wòrdu entretené ku músika di Axel & Friends riba e patio espasioso dilanti di e hotèl, i diferente stakeholder a hiba palabra di gradisimentu. E diskurso di apertura, a keda den man di General Manager Ernst van Zutphen i Jimmy Shandor, VP Operations Highgate. Despues di un intermezzo musikal, ministernan Charles Cooper i Ruisandro Cijntje tambe a hiba palabra. Nan tur dos a papia di e trayekto te na apertura di Courtyard Curaçao, ku a kuminsá na 2006 ora ku Gilbert a aserká gobièrnu pa un pèrmit p’e por desaroyá e tereno komersialmente.
Minister Cooper a bisa: “Nos ta orguyoso ku huntu ku gobièrnu a habri kaminda p’e visionarionan tras di Courtyard Curaçao, p’asina e hotèl eksepshonal aki haña su lugá literalmente den kurason di nos isla.” Minister Cijntje ta agregá: “The Courtyard Curaçao ta un bunita adishon na nos ofresementu turístiko, spesialmente pa turistanan merikano, “E ta un meskla perfekto di normanan internashonal, e kultura riku di Kòrsou i e forsa di nos hospitalidat lokal.”
E inisiadó di e proyekto tambe a hiba algun palabra. El a enfatisá kon orguyoso e ta, ku apesar di e retonan, e por presentá e hotèl ku sosten di finansiadornan lokal, e desaroyadó di e proyekto i e tim di Courtyard by Marriott.
E invershonistanan, Fondo di Penshun Isla i Fondo di Penshun Vida Nova a enfatisá e importansia di invershonnan den turismo dor di fondonan di penshun i a indiká ku e proyekto aki a proba ku invershonnan asin’aki ta balapena. Nan ta orguyoso ku Courtyard Curaçao ta un di e promé hotèlnan riba nos isla, 100% finansiá lokalmente.
Na final Alberto da Costa Figueira di CMC Operations N.V. tambe a hiba palabra. El a enfatisá ku e trayekto no tabata unu fásil i sin desafio, sinembargo e ta orguyoso di e resultado. El a gradisí maneho di e hotèl i tur partner pa nan koperashon i a invitá pueblo di Kòrsou pa bishitá Centro Gastrobar, e restorant den lobby òf pa reservá un ‘staycation’.
Despues di un presentashon espektakular di bailarin ku kandela i un show di vürwèrk a mustra e invitadonan rònt di e hotèl. A disfrutá di un kòktel na Centro Gastrobar i a bishitá e área di pisina elevá i un di e kambernan ku e invitadonan.
Courtyard by Marriott Curaçao, situá na Pater Euwensweg 11 na Otrobanda, tin 150 kamber i 2 suite. E hotèl ta ofresé un eksperensia di hotèl moderno i fleksibel, inkorporando vários elemento di naturalesa i kultura di Kòrsou. E hotèl ta wòrdu operá komo un frankisia di Courtyard by Marriott, e ta un propiedat di CMC Real Estate i ta wòrdu manehá dor di Highgate. Pa mas informashon tokante e hotèl por bishitá www.courtyardcuracao.com
